Республиканы жолларын жангыртыргъа 300 миллион сом бёлюннгенди

Бюгюн Россей Федерацияны Правительствосуну бегими басмаланнганды, анга кёре регионланы жолларында къурулуш ишлени бардырыргъа 120 миллиард сом бёлюнюрюкдю. Къабарты-Малкъар Россей Федерацияны «Транспорт системаны айнытыу» къырал программасына кёре эм «Регионланы, муниципалитетлени арасында эм жер-жерли автомобиль жолланы айнытыугъа себеплик этиу» федерал проектни чеклеринде 300 миллион сом аллыкъды, деп билдиргендиле республиканы оноучусуну пресс-службасындан.

Ырысхыланы бериуню юсюнден оноу Россейни Президенти Владимир Путинни буюуруу бла этилгенди. «Биз жолланы айнытыу жаны бла белгиленнген кёрюмдюлеге жетер ючюн, Президент бир ай алгъа къошакъ халда 120 миллиард сом бёлюрге оноу этген эди. Анга тийишлиликде регионла бла ишни терк бардыргъанбыз, ырысхыланы къыйматлы хайырланырча алгъа тамамланыргъа керекли проектлени белгилегенбиз, нек дегенде, ахчала банклада салынып турмагъанлай ишлеп тебиресинле деген мурат бла, -деп билдиргенди РФ-ни Правительствосуну Председателини орунбасары Марат Хуснуллин.

Бёлюннген ахчадан 2,5 минг километр регион жолну тап халгъа келтирсинле деп 63 субъектге 86 миллиард сом бёлюннгенди. Къалгъаны -34 миллиард сом жоллада къурулуш, жангыртыу эм уллу трассаланы тынгылы ремонт этерге къоратыллыкъдыла, ол санда Алтын тогъай эм Европа – Запад Къытай жолла бардыла. Аны бла бирге, 70 регионнге жууукъ къошакъ халда ахча болушлукъну аллыкъдыла. Ырысхыла ремонт ишлени бардырыргъа, жолланы кенгертирге эм жангы жол инфраструктураланы, ол санда кёпюрлени эм башха затланы ишлерге къоратыллыкъдыла.

Эсигизге салайыкъ, «Къоркъуусузлу автомобиль жолла» миллет проектни чеклеринде быйыл Къабарты-Малкъарда 70 объектде ишле бардырыллыкъдыла, аладан экиси келир жылгъа кёчерикдиле.   

 Эллени комплексли айнытыу къырал программагъа кёре, сегиз объектни Кёнделенни, Экинчи Чегемни, Урухну, Анзорейни, Интернациональныйни, Бабугентни, Ново-Ивановканы чеклеринде эм  Хушто-Сыртда бла Тёбен -Чегемде ремонт иш бардырыллыкъдыла. Экинчи Чегем-Булунгу автомобиль жолгъа тынгылы ремонт этилликди эм Нальчик-Нарткъала жолда асфальтны алышырыкъдыла. Бюгюнлюкде комплексли магъаналы жол къурулушладан бирлерине Нальчикде Ленин атлы, Шогенцукова, Къули улу проспектлеге  эм Кабардинская орамгъа тынгылы ремонт этиле тургъан ишле саналадыла. Жоллада къурулушла  республиканы 100-жыллыгъына бошаллыкъдыла.

Юсюбюздеги жылда 170 километр регион эм жер-жерли автомобиль жоллагъа ремонт этерге мурат барды.

2022-2024 жыллада федерал автомобиль жолланы  тынгылы ремонт этиу бла байламлы программаны жашауда бардыра эм бир-бир участкалада жолну кенглигин тёрт автомашина жюрюча этиу бла байламлы 27 километр хайырланыргъа берилликди.

Ол программагъа  Р-217 «Кавказ» федерал автомобиль жолну Малка элден тебиреп Куба-Табагъа жетген жерге дери участокну 7,5 километри, Аргудандан тебиреп Шимал-Алания Республиканы чегине дери 15,4 километри эм Залукокоаже бла Прогресс элленни къатындан башлап Ставрополь крайны чегине дери участокла киредиле.  

Бизни корр.