Казбек Коков Пенсия фондну регион бёлюмюню таматасы бла тюбешгенди

КъМР-ни Башчысы Казбек Коков Пенсия фондну Къабарты-Малкъар Республикада бёлюмюню таматасы Николай Баков бла ишчи тюбешиу бардыргъанды.   Анда къырал социал политиканы бардырыу бла байламлы  эм инсанланы тюрлю-тюрлю категорияларына социал  тёлеулени бериуню юсюнден сёлешиннгенди. 

Артыкъ да  сабийлеге сегиз жылдан тебиреп, он жети жыл толгъунчу бериллик тёлеуле къалай этилликлерине  аслам эс бурулгъанды. Къыралны жанындан жангы социал болушлукъ Россейни Президенти Владимир Путинни башламчылыгъы бла бардырылады, деп билдиргендиле республиканы оноучусуну пресс-службасындан.

Пенсия фондну регион бёлюмюню таматасы республиканы оноучусуна билдиргеннге кёре, бюгюнлюкге норматив-право база къуралгъанды, ол тийишлисича ишлейди, бёлюнюрюк бюджет ахчаланы ёлчемлери белгиленнгендиле. Бёлюмню мурдорунда ишчиле  ол жумушну тыйгъычсыз тамамларча билим алгъандыла,  тёлеулени заманында ётдюрюрча технологияла жаны бла керекли болумла къуралгъандыла.

 Пенсия фондну регион бёлюмю  бла  Жумушланы тамамлагъан кёп функциялы ара келишим этгендиле, анга кёре ай сайын тёленирик ахчаланы алыргъа деп жазылгъан къагъытланы эсепде тутарыкъдыла. Андан сора да тюрлю-тюрлю структурала бир-бирлери бла билдириулени электрон амалда бардырыргъа кереклисине уллу эс бурулгъанды.  Бардырылгъан аналитика ишге эм къабыл этилген законнга кёре, республикада пособияланы аллыкъ юйюрле белгили болгъандыла.

Къабарты-Малкъарда пособияла 67 минг сабийге тёленедиле. Тёлеуле апрель айда тохташдырылгъандыла, ахчаны 1 майдан берип тебирерикдиле. Ол жумушлагъа федерал эм регион бюджетден 8 миллиард сом бёлюнюрюкдю. Адамла бла билдириу ишни тийишлисича бардырыргъа  волонтёрла да къошулгъандыла. Ала ангылатыуланы майны ал байрам кюнлеринден тебиреп, айны ахырына дери бардырлыкъдыла.   

Тюбешиуню ахырында КъМР-ни Башчысы Казбек Коков Пенсия фондну республикада бёлюмюню ишчилерин социал болушлукъ бериу жаны бла жумушланы тийишлисича тамамлагъанларын белгилегенди. Дагъыда  регионну оноучусу  тёлеулени заманында, тыймай берирге эм аланы алыргъа деп келген адамлагъа эсни бютюн бек бурургъа кереклисин белгилегенди.   

Бизни корр.