Кесигизни хыйлачылагъа алдатмагъыз

Аманлыкъчыла инсанларыбызны алдаргъа, хар кимге да терк ийнанып къалгъаныбыз бла хайырланып, ахчабызны урларгъа ёчдюле. Муратларына жетер ючюн а ала кюн сайын жангы мадарланы къурайдыла. Бюгюнлюкде уа электрон почтаны онглары бла  хайырланнган кезиуле кёбейгендиле. Хыйлачыла инсанланы электрон почталарына борчларын тёлерге кереклисини юсюнден билдириуле ашырадыла, анда уа ахчаны салыргъа керекли жерни да белгилейдиле. Алай аны ачсанг, вирус жайылып,   инсанны банк картасыны тарихлери аманлыкъчылагъа ачыкъ этиледиле.

Россейни Сюд приставларыны федерал службасыны КъМР-де Управлениясы    быллай кезиуледе ырысхыны къалай сакъларгъа кереклисин ангылатадыла. Биринчиден, сизге быллай электрон письмо келген эсе, аны ачмагъыз, анда белгиленнген сайтлагъа кёчмегиз, танымагъан адамлагъа банк картагъызны шартларын билдирмегиз, бир тюрлю финанс операция бардырыргъа унамагъыз.

Борчугъуз болгъанын бла къалгъанын  ФСПП-ны Управлениясыны сайтында (r07.fssp.gov.ru) билирге онг барды. Ол жаны бла шартла «Толтуруу бегимлени шартлары» бёлюмде неда Къырал жумушланы бирикдирилген порталында (госуслуги) басмаланыпдыла.

ФССП-ны бла аны субъектледе бёлюмлерини официальный сайтларыны адреслерин  сизге келген билдириу бла тенглешдиригиз. Ол а жалгъан сайтны ачыкъларгъа болушурукъду. Компьютерлеригизге вируслагъа къажау программала салдырыгьыз. 

Хурметли окъуучула. Сакъ болугъуз. Бу женгил жорукъла сизни хыйлачыладан сакъларгъа, ахчагъызны тас этмезге болушурукъдула.

 

Тикаланы Фатима хазырлагъанды.
Поделиться: