Проектле къыралны Президентине кёргюзтюлюнюрюкдюле

 Къабарты-Малкъар къырал университетни «Точка кипения» майданында «Жангы заманнга кючлю оюмла» форумну регион сессиясы бардырылгъанды. Ол толтуруучу власть эм жер-жерли самоуправление органланы, профессионал сообществоланы, билим бериу учрежденияланы, предпринимательлени къатышыулары бла адамланы, бек алгъа уа жаш тёлюню башламчылыкъларын, социал магъаналы оюмларын жыйыу мурат бла къуралады.

 Форумну ачылыуу бла жыйылгъанланы республиканы билим бериу, илму эмда жаш тёлюню ишлери жаны бла министрини орунбасары Екатерина Мисостова, университетни жамауат мероприятияла эм «Миллет технология башламчылыкъ» программаны проектлери бла байламлы департаментни директору Махийланы Танзиля, университетни Компьютер технологияла эм информация къоркъуусузлукъ кафедрасыны доценти Рита Гурфова, «Точка кипения» майданны программа директору Заур Альтудов алгъышлагъандыла.

 Екатерина Мисостова бу форум жаш адамлагъа фахмуларын ачыкъларгъа, башламчылыкъларын жашауда толтурургъа ахшы онг болгъанын белгилегенди. «Форумда ишигиз, бек алгъа, республикада болумну игилендириуге аталады, жетишимли болуругъузну тежейме», - дегенди ол.

  Рита Гурфорва, бу форумну магъаналылыгъын черте, айныугъа келтирлик оюмланы жыйыуну юсюнден письмола субъектлени Башчыларына келгенин, аны къураучу комитетине таматалыкъны уа Россейни Президентини болушлукъчусу Максим Орешкин этгенин билдиргенди. Ол айтханыча, форум талай кесекге юлешинирикди. Эм алгъа, анга къатышханланы оюмларын жыярыкъдыла, артда аладан эм игилери сайланырыкъдыла. Бу форум 2020 жылда да бардырылгъанды, анда хорлагъанлагъа башламчылыкъларын жашауда тамамларча ахча болушлукъ этилгенди.

  Форум жети блокдан къуралады: социал, медицина, билим бериу жумушланы качестволарын игилендириу, жарлылыкъ бла кюрешиу, инфекциялы болмагъан, жюрек-тамыр эм башха аурууладан ёлюмню азайтыу бла байламлы «Миллет социал башламчылыкъла»; сакъат адамлагъа себеплик этиу эм университетледе бла илму организациялада инженер-билим бериу консорциумланы къурау «Миллет технология башламчылыкъ»; къошакъ билим бериу эм сабийлеге усталыкъ сайларгъа болушуу, жаш тёлю предпринимательствону айнытыу, иш бла жалчытыу  «Миллет кадр башламчылыкъ»; таза технологияланы хайыры бла экология болумну игилендириу «Миллет экология башламчылыкъ»; регионлада инвестиция тириликни ёсдюрюу «Предпринимательство»; субъектле аралы жангы  проектлени жарашдырыуну юсюнден «Регионланы айнытыу» эм бу тематикалагъа кирмеген, алай къыралда саулай да болумну игилендириу бла байламлы «Ачыкъ сёлешиу». 

  Хар блокга  бек аздан бешишер адам киргенди, ала бла кураторла ишлерикдиле. Форумда эм игилеге саналгъан проектле аны очный кезиуюнде июльда Москвада къыралны Президенти Владимир Путиннге кёргюзтюлюнюрюкдюле.