Эм эски юйню оюп, суратына кёре башхасын сюерикдиле

       Сёз Нальчикде Суворов атлы бла Революционная орамла бирге къошулгъан жерде орналгъан юйню юсюнден барады. Бусагъатда ол тозурап бек осал халдады, ичинде адам жашарча тюйюлдю. 2006 жылда комиссия  мекямны жараусузгъа санагъандан сора,  муниципал программагъа кёре  аны  ичинде жашагъанланы  башха жерге кёчюрюрге оноу этилген эди. Андан сора  тёрт юйюр жангы  фатарлагъа кетгендиле, болсада бюгюнлюкде анда арталлыда  кетерге сюймеген  биреулен барды.
         Нальчик шахарны администрациясындан билдиргенлерича, быйыл юй ишленнгенли  эки жюз жылгъа жууукъ боллукъду,  алай ол тарых байлыкъча сакъланыргъа керек болгъан объектлени санына кирмейди.  Онтогъузунчу ёмюрледе мында Кавказ ызны арасыны управлениясы орналгъанды. Андан сора кёп жылланы ол Голицынны юйю болуп тургъанды.  Совет власть келгенде уа аны сыйырадыла эмда бир къауум юйюрге бередиле.
        Мэрияда айтханларын кёре, мекям асыры тозурагъандан, аны жангыртырча тюйюлдю, алай Миллет музейде сакъланнган чертёжла бла жангыдан тюз аллай журт ишлерге  жарарыкъды.  Аны оярдан алгъа, артда къурулушну кезиуюнде хайырланырча ичин, тышын да суратлагъа тюшюрлюкдюле. Алай ол ишлени башлар ючюн аны ичинде киши да жашамазгъа керекди, деп билдириледи информагентстволаны материалларында.