Шёндюгюлю технологияланы кенг хайырлана

Бюгюнлюкде дуния терк тюрленеди, айныйды. Школда сабийлени уллу жашаугъа хазырлагъан устаз да, жашаугъа кёре, усталыгъын, билимин да дайым ёсдюрюрге, кесини предметине юйретгенден тышында, технологияла, илму къаллай халда болгъанларын билирге тийишлиди. Улбашланы Фатима Владимировна, ол жорукъланы тюзге санай, хар не жаны бла да айныргъа итинеди эм кесини сынамын сабийлеге да сингдиреди.

Фатима Владимировна Къабарты-Малкъар къырал университетни 1998 жылда бошагъанды, 1999 жылдан бери Тёбен Чегемни школунда ишлейди. Химиядан устазды, директорну юйретиу иш жаны бла орунбасарыды, школда «Точка роста» арагъа башчылыкъ этеди.

Ол билдиргенича, «Точка ростада» сабийле шахматла ойнайдыла, 10-11 класслада окъугъан жашчыкъла «Ата журтну къоруулаугъа хазырма» деген кружокга жюрюйдюле. Башланнган классланы окъуучулары программированиягъа юйренедиле, кёп болмай аланы ишлерини презентациясын да къуралгъанды. Квадрокоптерлени учурта, сабийле билимлерин ёсдюргенден тышында, зауукълукъ да аладыла. «Дуния объективде» деген кружокну чегинде окъуучула сурат тюшюрюрге юйренедиле, 3D принтерде  моделирование бла кюрешедиле.

- Тёбен Чегем республиканы ара шахарындан узакъ болгъаны ючюн, бу точкала сабийлеге технологияла жаны бла айныргъа уллу себепликдиле. Бек башы уа, сабийле анда дерслеге сюйюп, керти да сейир этип жюрюгенлериди. Былтыр выпускнигибиз Акушуланы Ачемез республиканы къауумуну санында, анга уа 11 адам киргендиле, Тамбовха баргъан эди. Анда да уллу ара барды,  Ачемез диплом бла саугъаланнганды, мында юйреннгенин да хайырлана Москвада усталыкъ билим ала турады. Къумукъланы Тембулат, ахшы окъугъанындан тышында, универсальный сермешледен спортну устасына кандидатды, Мызыланы Кязим ауур атлетикадан спортну устасы болгъанды, деп билдиреди Фатима Владимировна.

Окъуучуларыны аллай жетишимлери уа саулай школгъа да къууанчды.

              

 

Кульчаланы Зульфия.
Поделиться: