Ал жанында терк медицина болушлукъ тапдырыуну магъаналы соруулары

Къабарты-Малкъар Республиканы Башчысы Казбек Коков КъМР-ни саулукъ сакълау министри Рустам Калибатов эмда КъМР-ни къыйын болумлада медицина эм терк медицина болушлукъ тапдырыу арасыны таматасы Алим Карданов бла ишчи тюбешиу къурагъанды.

Республиканы оноучусу терк болушлукъну чакъырыула кюннге 500-ге жетген коронавирус жукъгъан ауруу бютюн жайылгъан кезиуде кеслерин аямай уруннганлары ючюн араны ишчилерине ыразылыгъын айтханды. Бусагъатда терк болушлукъ берген станция тёрели низамда ишлейди – кюннге 200 чакълы бир чакъырыу болады.

Кенгешни кезиуюнде республиканы терк жетген медицина службасына магъаналы болгъан соруула сюзюлгендиле, ол санда энчиленнген медицина транспортну автопаркыны болуму. Терк болушлукъ тапдыргъан службаны автопаркы жыл сайын ата журтлу автомобиль промышленностьха себеплик этген программагъа кёре жангыртылынады. Жаланда 2019-2021 жыллада республикагъа 58 автомобиль бёлюннгенди.

Битеу да бирге медицина организациялада 204 санитар улоу барды, ол санда 14-сю – «А» класслы, 155-си – «В» класслы, 35-си  – «С» класслы. Автопаркны 60 процентинден азыны хайырланыуларыны заман болжалы 5 жылдан кёп тюйюлдю. «Транспортну сакъларгъа тийишлиди, ол бийик ауурлукъ чыкъгъан болумлада ишлейди, аны ючюн а терк эскирирге болады. Ремонт мастерскою, качестволу сервис жалчытылыныуу болгъан бирлешген автобазаны къурау амалгъа къарарыкъбыз», - деп белгилегенди Казбек Коков кенгешни чегинде.

Андан сора да, Лермонтов атлы орамда орналгъан терк болушлукъ тапдыргъан станцияны мекямында тынгылы ремонт этерге эм трассовый службаны ахча бла жалчытылыныуун кёбейтирге мурат барды. Регионну федерал трассаларында сау сутка ишлерин бардыргъан катастрофаланы медицина арасыны 5 пункту ишлейдиле. Ол жол-транспорт болумлада ачыгъан адамлагъа медицина болушлукъну терк тапдырыргъа, жолда окъуна тийишли реанимация жумушланы хайырланырча онг береди.