Россейде терк айныгъан терек бахчачылыкъны сингдириу жаны бла бизни республика биринчи болгъан эди. Шёндюледе да Къабарты-Малкъар бу сферада ал жерни бир регионнга да ычхындырмайды, деп билдиргендиле КъМР-ни Эл мюлк министерствосундан.
Быллай бахчачылыкъны айнытырча республикада хар не да барды дерчады. Ол санда иги айныгъан инфраструктура, гитче терекчикле ёсдюрюу, бетон чыпынла, буз ургъандан къоруулагъан аула, пластик орунла эмда терек бахчачылагъа ишде керекли затла чыгъарыучу производствола да.
Терк айныгъан терек бахчаланы битеу кереклисин да жарашдырып, бир кезиуге толусунлай къураучудула. Ёсдюрюлген продукцияны бузултмай, жаз башына дери окъуна тап халда сакъларча жемиш кюфле ишленедиле. Алада жангы технологияла хайырланыладыла, алмаланы уллу пластмасс орунлагъа жыйып, энчи камералагъа саладыла. Анда уа хауаны къурамы, сууукълугъу да аланы бутакъладан тюз шёндю юзюп жыйгъанча аллай халда иги кесек заманны сакъларгъа онг бередиле.
Бёлюм нечик тири аякълана баргъанын быллай шартла кёргюзтедиле: 2014 жылда республикада терек бахчала 13,8 минг гектар жерни ала эдиле, ол санда терк айныгъан технологияла бла къуралгъанла – 3,3 мингни. Шёндю уа кёпжыллыкъ битимле 19,8 минг гектарда ёсдюрюледиле, ол санда терк айныгъан терек бахчала уа 7,5 минг гектар жерде къуралгъандыла. Дагъыда ал заманлада быллай иш бла 72 предприятие бла организация кюрешиучю эселе, бюгюнлюкде аланы саны 370-ге жетгенди.
Алай бла терек бахчачылыкъ Къабарты-Малкъарны эл мюлкюнде ахшы тюрлениулени шарт кёргюзтген бёлюм болгъанды деп ышаннгылы айтыргъа боллукъду. Ол экономика жаны бла иги да файдалыды, социал магъананы да тутады. Ары этилген инвестицияланы терк къайтарыргъа, кёплени иш бла жалчытыргъа да амал береди.
