Сиз предпринимательликни юсюнден не билесиз?

12 апреля, 2019 - 08:19

«Иш кёллю Россей» жамауат организация Россейни тарыхчылары бла бирге бизни къыралда предпринимательствону юсюнден школчуланы арасында олимпиада бардырлыкъды. Организацияны республикада бёлюмюнден билдиргенлерине кёре, бу ишни баш магъанасы - къыралны аякъ юсюне салыугъа предпринимательствону къошумчулугъун белгилеудю эмда аны бла байламлы керти шартланы туура этиудю. 

Эришиуле эки кезиулю боллукъдула. Къабарты-Малкъарда регион кесеги экинчи кере бардырыллыкъды. Аны къурагъанланы санында сагъынылгъан организацияны бёлюмю, КъМР-ни Жарыкъландырыу, илму эм жаш тёлюню ишлери жаны бла министерствосу эмда Къабарты-Малкъар къырал университет бардыла.

Олимпиада 26 апрельде вузда ётерикди. Анга 8-11 классланы окъуучулары къатышыргъа боллукъдула. Соруула барына да бирча боллукъдула.
Эсеплеге кёре хорлагъаннга биреулен саналлыкъды эмда эки призёр боллукъду. Биринчи жерни алгъан а олимпиаданы къырал кесегине къатышырыкъды. Ол хар регионда да бир кезиуде заочно ётерикди.

Заявканы формасын http://www.deloros-kbr.ru/index.php/proekty/istoriya-rossijskogo-predpri... сайтда алыргъа боллукъду. Аны 23 апрельге дери берирге тийишлиди. Сейирлери болгъанла Гузеланы Индирагъа deloros_kbr@mail.ru электрон почтагъа жазсынла неда 8-903-425-71-45 телефон номер бла сёлешсинле. 
 

Улбашланы Мурат.
  • 20 просмотров
Поделиться: