Жолланы игилендириу тири барады

Къабарты-Малкъарда былтыр жол мюлк бёлюмде аслам иш тамамланнганды.  Саулай алып айтханда, республикада 195 километр чакълы жол мардалагъа келиширча этилгенди. Андан  157 километр   регион эм 38 километр да  муниципал магъаналыладыла. Аны юсюнден бизге КъМР-ни Транспорт эмда жол мюлк министерствосуну пресс-службасындан билдиргендиле.  
«Къоркъуусуз эм качестволу  жолла» миллет проектге кёре, 116,9 километрде 40 объект  тапландырылгъанды.  Ведомствону отрасльни айнытыу бла байламлы бешжыллыкъ планыны чеклеринде 2024 жылгъа жолланы 85 процентине асфальт салынырыкъды.

Эсге сала айтсакъ, былтыр  республиканы Правительствосу салгъан борч толусунлай толтурулгъанды. Транспорт эм жол  мюлк министерствосу  117,1 километр автомобиль жол жангы излемлеге келишрча мадар этгенди. Ол санда федерал бюджетден къошакъ ахча бёлюннгени себебинден белгиленнгенинден  эсе  70 километрге артыкъ.  Аны хайырындан былтыр биринчи кере республика «Къоркъуусуз эм качестволу жолла» миллет проектни жетишимли толтургъан регионланы тизмесине кирип, РФ-ни Правительствосуну диплому бла саугъаланнганды. 

Ишлени кезиуюнде жангы асфальт жайылгъан сора да, бордюрланы тротуарланы, суу саркъгъан арыкъланы, улоула тохтагъан комплекслени жангыртхандыла эм къоркъуусузлукъ жалчытылынырча мадар этилгенди.

Тынгылы ремонт регион аралы  жолладан сора да, шахарланы бла муниципалитетлени ара орамларында да этилгенди. Алай бла бюгюнлюкде Яникойда, Огъары Жемталада, Ново-Ивановскоеде, Нальчикде, Бахсанда, Прохладнада, Майскийде, Нартанда, Заюковода, Эски Черекде, Плановскоеде эм Каменномостскоеде жолла игилендирилгендиле.

Аны бла бирге, КъМР-ни Башчысы Казбек Коковну буйругъу бла былтыр къыйын эм иги кесек къоранч излеген, Прохладна бла Май районну арасында онкилометрлик участок «Прохладный – Эльхотово» жол   биттирилгенди.  Ишлени кезиуюнде ючкъат асфальт салыннганды, тёрт кёпюрге ремонт этилгенди эм башха жумушла да тамамланнгандыла.

Аны бла бирге, былтыр жылны ахырында суткагъа 34 минг машина жюрюген Нальчикде Къабарты орамда Идаровагъа къошулгъан жерден тёбен тынгылы ремонт этип башлагъандыла.  Былайтын иги кесек транспорт Май бла Прохладна районлагъа барады, ол санда ауур жюк ташыгъан машинала   да.  Ол  быйыл августха битерге керекди.

КъМР-ни Транспорт эмда жол мюлк министерствосу жолда къоркъуусузлукъгъа да аслам эс бурады. Былтыр 74 километр чакълы бирде кече жарытырча чыпынлы чыракъла салыннгандыла, 243 километрде «зебралада» Т7 светофорла жарашдырылгъандыла, 11 километрде темир буруула тартылгъандыла эм юч мингден аслам белги салыннганды. Аварияла аслам болгъан жерледе уа элли камера салыннганды.

Сагъынылгъан жумушла водительлеге эм жаяу жюрюгенлеге да тап эм къоркъуусуз болурча этиледи. Ол себепден мындан арысында да жолла мардалагъа келиширча    аслам иш  толтуруллукъду.

Курданланы Сулейман.
Поделиться: