Фахмулу актёрла, эсде къалгъан оюнла

Белгили актёр Андрей Мироновха быйыл 80 жыл толургъа керек эди.

«Бриллиантовая рука» фильм экраннга 1969 жылда чыкъгъанды. Къараучула аны бек жаратхандыла, алай Мироновха уа анда ишлеген тынч болмагъанды. Бу фильмге дери ол «Три плюс два» комедияда ойнагъанды, алай алыкъа анга уллу рольла бермегендиле. Гайдай бла бирге ишлеу а артистге атын айтдырыргъа болушурукъ эди, аны ючюн ол фахмусун, кючюн да аямагъанды. Белгилерге тийишлиди, аманлыкъчы-контрабандистни режиссёр сакълагъанындан ахшы окъуна кёргюзтгенди.

Баш роль алгъадан окъуна Юрий Никулиннге жораланнгаан эсе, Гешаны уа талай актёрдан сайлагъандыла: Георгий Вицин, Валерий Носик, Рудольф Рудин бла Михаил Пуговкин. Къарауладан сора Мироновну кандидатурасын къабыл кёргендиле, бютюнда ол Папанов бла «Берегись автомобиля» кинода бирге ахшы ишлегенлери ючюн.

«Бриллиантовая рука» комедияны кюлкюлю кезиулеринден бири Геша айрыкамда кеси къалып, сууну башы бла ётген жашчыкъны ызындан баргъаныды. Бу сцена Мироновха къыйын берилгенди, бирде ол аягъын терс басып жыгъылгъанды, бирде жашчыкъ, аны актёр ургъанындан сора, кадрдан бир жанына чартлап тургъанды. Аны къалай тюзетирге билмей, режиссёр сабийге Андрей жанынг бла ётюп къаллыкъды дегенди, Мироновха уа аны къатыракъ тюртюрге буюргъанды. Дубльни тап жангызда андан сора алдыргъандыла, сабийни уа Никулинни жашы ойнагъанды.

Бу сценада Миронов асыры къаты къычыргъандан, аны къутхарыучула окъуна эшитгендиле эм мычымай съёмкала бара тургъан жерге келгендиле. Ол болумну юсюнден «Советская Кубань» былай жазгъан эди: «Къара тенгизде къаяны артында бугъуннган ариу, тынчлыкълы жерчик. Июль кюню жарыкъ тиеди. Тенгиз сууу жылтырайды, хычыуун аязчыкъ урады. Ол тынчлыкъны бузгъан бир зат да жокъду. Сора, билмей тургъанлай: «SOS! SOS! Спасите! Помоги-и-и-те! Мамочка ро-о-о-одная! SOS!» - деп къычыргъан тауушла элгендиредиле. Гитче айрыкамчыкъда, юсю да суу болуп, биреу, амалсыздан ары-бери чабады, къыйырындан да буштукъ чёргеп, таякъны жан-жанына булгъайды.

Къутхарыучу катер ары тюз окъча учады. Ол айрыкамгъа жетер-жетмез, биреу, ачыуланып, мегафон бла: «Жолдашла, артха! Сиз кадргъа киргенсиз! Былайда кино алына турады», - дейди. Бир кесек ачыуланнган да этип (жангызда адамланы къоркъутадыла деп), аны бла бирге уа бир киши да батмагъанына къууанып, къутхарыучула артха кетгендиле. Актёр а, режиссёрну буйругъун толтура, бютюн къаты къычырады, тенгизге жыгъылады. Бу сцена жангыдан бир ненча кере къайтарылады».

Мороженое бла сценаны да 8 кере алдырыргъа тюшгенди. Кинода Мироновха мороженое атханча кёрюнеди, алай ол кезиуде аны хумужугъа алышхан эдиле – ол бетине ариууракъ жабышады деп.

Тыш къыраллы съёмкаланы уа Бакуда бардыргъандыла. Ала Мироновха бютюн къыйын берилгендиле – ол кезиуде актёр экземадан къыйнала эди. Алай «мотор» деген сёзню эшитгенлей, ачытханын унутуп, ышара-ышара, кадргъа кирип тургъанды.

Козодоевни тюшюн да эсге тюшюрейик. Анда, къайдан эсе да, къол чыгъып, бууаргъа кюрешеди. Бу рольну Гайдай кеси ойнагъанды.

Комедияны, башда сагъыннганыбызча, жамауат сюйгенди, биринчи жылда анга 77 миллион адам къарагъанды. Бюгюнда кёпле, фахмулу артистлени жашаудача ойнагъанларына къарай, зауукълукъ табадыла.

Кульчаланы Зульфия хазырлагъанды.
Поделиться: