Эллени айныуларына – 151 миллион сом

Былтырны ахырына Къабарты-Малкъарда «Эл жерлени комплекс халда айнытыу» къырал программагъа кёре талай социал объект хайырланыргъа берилликди. КъМР-ни эл мюлк министри Хасан Сижажев айтханнга кёре, Солдатская бла Пролетарское эллени таза суу бла жалчытыр ючюн жангы скважинала къазыу иш бошала турады. Аны бла бирге Къашхатауда орта школну къошакъ мекямы эм Маданият юй да жангыртыллыкъдыла.

- Пролетарское элдеги мектепге тынгылы ремонт этилгенди. Быйыл жангы окъуу жылда сабийле омакъ школгъа баргъандыла. Элде орамла жарыкъ болурча мадар да этилгенди. Сагъынылгъан федерал программагъа кёре, бюджет ахчагъа Къашхатауну Маданият юйюне эки автобус алыннганды. Солдатская элде уа 140 сабийге садик ишлене турады. Ол да экинчи жылгъа битерикди, - дейди министр.

Къырал программагъа кёре бардырылгъан ишлеге быйыл 151,4 миллион сом бёлюнюрюкдю. Аны иги кесеги - 149,9 миллиону - федерал бюджетденди, республика да кесинден 1,5 миллион сом къошарыкъды.

Эсге сала айтсакъ: «Эл жерлени комплекс халда айнытыу» къырал программа Эл мюлк министерствону башламчылыгъы бла бардырылады. Аны магъанасы эл жерледе сынамлы кадрланы сакъларгъады эм адамланы жашау болумларын игилендириргеди.

Магометланы Сулейман.
Поделиться: