Паспортну жарашдырыуда жангы жорукъла

Келир жыл биринчи июльдан башлап, Россей Федерацияда паспортла бериуню эмда алышындырыуну болжалы бирча боллукъду, деп билдиргендиле КъМР-ни прокуратурасындан.

Россейни МВД-сыны быйыл 8 ноябрьде чыкъгъан 854-чю номерли буйругъуна кёре, паспортну бериу эмда алышындырыу жумуш талай жорукълагъа келиширча этилгенди.

Алай бла, сагъынылгъан кюнден башлап, 14-жыллары толгъанла, паспортха документлерин алгъынча 30 кюнню ичинде угъай, 90 кюннге дери берирге эркиндиле. Ары дери борчлу халда салыныргъа керек белгилени уа энди адамны ыразылыгъына кёре саллыкъдыла. Сёз быланы юсюнден барады:

- некях этилгенни эмда юйюр чачылгъанны;

- сабийлени (РФ-ни 14-жыллары толмагъан инсанланы);

- алгъын берилген паспортланы;

- тыш къыраллы паспортланы.

Бу белгилени кёргюзтюрге сюйгенле тийишли документлени жарашдырыргъа керекдиле. Аланы тизмеси регламент бла тохташдырылады.

Дагъыда 2022 жылда 1 июльдан башлап паспортну алгъынча он угъай, беш ишчи кюнню ичинде жарашдырып берирге керек боллукъду. Ол кеси да инсан бу жумушну жашагъан жеринде этерге сюйсе. Башха кезиуледе уа аны болжалы 30 кюннге дери кенгертиледи.

Регламентде уа, инсаннга шагъатлыкъ этген, кеси да болжаллы халда берилген (къорууланмагъан) удостоверенияны жалгъан тюрлюсюн этиуден сакълагъан амалла кёргюзтюлгендиле. Келир жыл мартдан башлап, быллай удостоверение къорууланнган полиграфия продукциягъа саналлыкъды.

Жорукълада паспортда инсан къайда туугъанын эмда регистрациясы къайда этилгенин жазаргъа жараулу жерле да тохташдырылгъандыла.