Практика бла байламлы соруулагъа – энчи эс

Бу кюнледе Тегенеклиде волонтёр биригиулени таматаларыны Битеуроссей съезди болгъанды. Анга къыралны элли субъектинден 160 адам къатышханды.
Жыйылыуну ача, волонтёр араланы ассоциациясыны  советини (АВЦ) таматасы, РФ-ни Жамауат палатасыны келечиси Артём Метелев, бу тамаша жерде тюбешиуню къурагъаны ючюн Къабарты-Малкъар къырал университетге  ыразылыгъын билдиргенди. «Биз барыбыз да Москвада ВДНХ-да волонтёрланы   халкъла аралы форумуна къатышханбыз. Анда Россейни Президенти Владимир Путин, быйыл  Волонтёрну  жылы бошалгъанын айта, къымылдауну магъанасы мындан арысында да бийикде боллугъун билдиргенди. Мында ишибизни практика жанындан, ол санда  келир жыл къаллай  жумушланы тамамларыгъыбызны, къыйматлы проектлени эмда башха затланы юсюнден айтырыкъбыз», - дегенди Артём Павлович.
КъМКъУ-ну ректору Юрий Альтудов а: «Университетни волонтёрларыны юсюнден окъуна айтханда, ала магъаналы иш бла кюрешгенлерин белгилерге тийишлиди. Вуз да алагъа къолундан келгенича болушады. Сиз социал болумну игилендириуге уллу къыйын салгъаныгъыз ючюн ыразылыгъымы билдирирге эмда жетишимле тежерге сюеме», - дегенди.
КъМР-ни жарыкъландырыу, илму эм жаш тёлюню ишлери жаны бла министри Ауес Кумыков Волонтёрну жылы хар регионнга да къыйматлы болгъанын чертгенди. Ол айтханыча, аслам жамауат проектни жашауда бардырыргъа, жаш адамланы патриот сезимлерин кючлерге да мадар этилгенди аны кезиуюнде. «Бир жыл мындан алгъа аланы саны сегиз минг болгъан эсе, бусагъатда алагъа дагъыда он минг къошулгъанды. Аланы арасында школчула, студентле эм абаданла да бардыла. Биреуленнге болушлукъ берирге дегенча адет кавказчылада не заманда да болгъанды», - дегенди министр.
Жыйылыуда АВЦ-ни келечилери  къол кётюрюп, магъаналы оноула чыгъарылгъандыла. Ол санда: «Ассоциацияны иши бла байламлы жыл сайын эсепле чыгъарыу доклад», «Волонтёр араланы ассоциациясыны жангы уставын къабыл этиу», «Волонтёр араланы ассоциациясыны ишлерине мониторинг бардырыуну эсеплери», «2018 жылда  членствогъа къошулургъа сюйген  организацияланы белгилеу», «Келир жылда Ассоциацияны айнытыу жаны бла планны юсюнден доклад».
Съездни ахырында быйыл эм иги ишлегенлени саугъалагъандыла. Аланы санында Къабарты-Малкъардан «Продвижение» деген регионла аралы ресурс ара да  барды. Аны таматасы  Светлана Самофалова да сертификат къоллу болгъанды.
Жыйылыугъа къатышханла къырал программа бла билдирген сессиягъа, окъуу-методика семинарлагъа къатышхандыла, Азау талагъа экскурсиягъа баргъандыла, лыжалада, канаткалада, сноубордда учхандыла, гара сууладан ичгендиле эмда башха затлагъа къатышхандыла. Бу жыйылыу а алагъа ишлерин эсеплерге,  жангы планла къураргъа себеплик этгенин, аламат солургъа онг бергенин эмда мындан арысында да жетишимли ишлерге таукеллендиргенин айтхандыла.