КъМР-ни Башчысы Казбек Коков кёп сабийли 18 анагъа майдалла бергенди

КъМР-ни Башчысы Казбек Коков Ананы кюнюню аллында Къабарты-Малкъарда юйюрлени ол байрам бла  алгъышлагъанды эм республикада кёп сабийли 18 ананы  «Ана махтаулукъ» майдал бла саугъалагъанды, деп билдиргендиле республиканы оноучусуну пресс-службасыны келечилери.

Эпидемилогия болумгъа кёре, муниципал администрацияла бла мероприятияны видеоконференцсвязь амал бла бардыргъандыла, ары кёп сабийли анала чакъырылгъан эдиле. Аланы белгилеуге КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, Парламентни эм Правительствону келечилери, муниципалитетлени администрацияларыны  башчылары къатышхандыла,

Кесини чакъырыу сёзюнде КъМР-ни Башчысы Казбек Коков Къабарты-Малкъарны тиширыуларын келе тургъан Ананы кюню бла къызыу алгъышлагъанды. «Ана деген сёз, хар адамны да биринчи эм жашауунда эм магъаналы сёзледен бири болур. Анадан башланады хар зат да,  таянчакълыгъы эм юйюрню тутхучлулугъу, таусула билмеген халаллыгъы, къайгъы этиую эм  жумушакълыгъы. Ананы сюймеклиги бизни кючлюрек этеди, жашауубузда тюбеген къыйынлыкъланы хорларгъа эм жетишим болдурургъа ийнандырады. Бу энчи эм жюреклерибизге дери жетген байрам кюнде алгъышланы кёп сабийли аналагъа айтабыз. Уллу, шуёх юйюрледе ананы сабийлеге сюймеклиги бютюн бек ачыкъланады, жюрек халаллыкъны тёрелери бирден-бирге бериледи эм сакъланады,  жарыкълыкъны магъанасыны къыйматлылыгъы, шуёхлукъну, бир-бирге билеклик этиу эм ишлерге сюйюу», - дегенди Казбек Коков.   

«Бизни республикада 13 500 кёп сабийли ана жашайды, алада 40,5 минг сабий ёседи.  Бюгюн биз беш эм андан да аслам сабийни ёсдюрген 18 ананы саугъалайбыз. Аланы ичинде Прохладна районну Прогресс элинде жашагъан Маслова Екатерина Григорьевнаны белгилерге сюеме, аны 10 аламат сабийи барды. Кёп сабийли юйюр-ол уллу насыпды, аны бла бирге аланы ёсдюрген да тынч иш тюйюлдю  эм уллу да жууаплылыкъды. Баш иеме сизге. Сизни анача жигитлик  этгенигиз уллу намыс-сый берирге чакъырады эм башха  юйюрлеге юлгюдю, Къабарты-Малкъарны битеу тиширыуларына да», -дегенди Башчы.

Казбек Коков белгилегеннге кёре, юйюрлеге болушлукъ этиу, бек алгъа кёп сабийлилеге, аланы ёсдюрюрге тийишлисича онгла къурау,  жаш тёлюге жашауда кеслерине жер табарча  болушлукъ этиу  къырал политиканы баш борчларындан бириди, федерал эм регион даражалада да.  

«Ол болумла энди Россейни жангыртылгъан Конституциясында бегитилипдиле. Жашауда ала миллет проектлени эм комплексли къошакъ халда социал болушлукъ бериу программаланы хайырындан  бардырыладыла.

Дагъыда ол жаны бла магъаналы атламладан бири, Президентибиз Владимир Владимирович Путинни 2022 жылда жашау этерге жетерик ахчаны эм иш хакъ тёлеуню бек аз ёлчемин инфляция бла тенглешдиргенде, 8,6 процентге индексация этерге деген предложениясын  Къырал дума къабыл кёргенди.  Энди анга кёре, социал тёлеулени ёлчемлери ёсерикдиле, ала МРОТ -ну ёлчемине кёре тергеледиле, аллайлагъа уа юйюрлеге эм сабийлеге тёленнген пособияла саналадыла.

Къабарты-Малкъарда юйюрлеге социал болушлукъ этген системагъа 15 амал киреди. Мындан ары да ол жаны бла юйюрлеге болушлукъ этерча кючюбюзню кёбейте барлыкъбыз, ол амалла хар заманда да ишлерча эм къыйматлы да болурча.

Энтта биз билим бериу хар кимге да жетерча этерге эм аны качествосун кётюрюу бла тохтаусуз кюреширикбиз, ала барысы да юйюрге болушлукъ этиу бла байламлыдыла. Мектеплени, сабий садланы эм яслийлени къурулушларын бардырлыкъбыз эм жангыртырыкъбыз, сабийле айнысынла,  жашауда жерлерин тапсынла деп, иги онгла къурарыкъбыз. Хар сабий кесини онгун ачып, жашауда жерин табарча этерге керекди. Ол республиканы эм къыралны келир заманына уллу магъананы тутады», - дегенди республиканы оноучусу.

«Ана махтаулукъ» майдалла  кёп сабийли аналагъа жерлеринде-муниципал къуралыулада берилгендиле.

Беш эм андан да аслам сабийни ахшы ызда ёсдюргенлери ючюн къырал саугъалагъа Акъбулатланы Мариям (6 сабий), Арутюнян Светлана (5 сабий),    Газова Джульета (5 сабий), Дадова Жанета (5 сабий), Емкужева Елена (5 сабий), Залийханланы Фатима (5 сабий), Казанчева Марианна (5 сабий), Князева Мадина (7 сабий), Кокова Ирина (5 сабий), Ломовцева Анастасия (5 сабий), Маремукова Рината (5 сабий), Маслова Екатерина (10 сабий), Сокурова Аминат (8 сабий), Соловей Ирина (5 сабий), Темиржанланы Аурика (5 сабий), Хавцукова Аминат (5 сабий), Шереужева Арина (5 сабий), Шомахова Анжела (9 сабий) тийишли болгъандыла.

«Ана махтаулукъ» майдалны болумуна кёре, Маслова Екатеринаны юйюрю  «Газель» микроавтобус аллыкъды. Мероприятияны бошай Казбек Коков тиширыуланы энтта бир кере Ананы кюню бла алгъышлагъанды, саулукъ эм юйюр насып тежегенди. «Сизни сабийлеригиз жетишимли эм насыплы, бизни къыралны тийишли инсанлары болсунла», - дегенди Къабарты-Малкъарны Башчысы.