Кассация тарыгъыуну бериу болжалыны юсюнден ишге къаралгъанды

Россей Федерацияны Граждан кодексини 112-чи статьясыны 6 кесегине тийишлиликде, кассация неда надзор тарыгъыуланы бериу заманлары чыкъсала, аланы сюдню эркинлиги бла энтта да къайтарып берирге боллукъду. Ол кеси да сюд анга келтирген сылтауланы тюзге санаса. Сёз ючюн: тарыгъыу берлик адам ауруп къалса, анга ишин этерге чурумла чыкъсала эм башха затла болсала. Ала бары да сюдню бегими закон бла кюч алгъандан сора бир жылдан кеч къалмай болургъа керекдиле.

Россей Федерацияны Конституция сюдю ол заманны къайтарыуну юсюнден ишге къарагъанды. Анда тийишли ходатайство берген конкурс кредитор сюдню бегимини юсюнден бир жыл озгъандан сора билгенини юсюнден айта эди.

Банкротство бла байламлы ишледе, эркинликлерине сюдню оноуу бла бузукълукъ этилген инсанлагъа, Граждан кодексини 112-чи статьясыны 6-чы кесегинде айтылгъандан эсе бийик сюд гарантияла бериледиле. Аны себепли Конституция сюд быллай оноугъа келгенди: сюдню бегимине бир жыл озгъандан сора кассация тарыгъыу берирге жарамагъаны Россей Федерацияны Конституциясында белгиленнген тенглик эмда тюзлюк жорукъланы бузады. Ол санда конкурс кредиторла банкротство бла байламлы ишледе кеслерини эркинликлерин эмда закон бла белгиленнген сейирлерин къоруулайма дегенлеринде да.

Алай бла сагъынылгъан ишде кассация тарыгъыуну бериу болжалны къайтарыргъа чек салыр хыйсап бла Россей Федерацияны Граждан кодексини 112-чи статьясыны 6-чы кесегин хайырланыргъа жарамагъанын ангылатханды сюд, деп билдиргендиле КъМР-ни Прокуратурасындан.

Омарланы Мурат хазырлагъанды.
Поделиться: