Чачлары - акъ, жюреклери уа - жаш

Бу кюнледе Нальчикде кюмюш волонтёрланы биринчи республикалы форумлары болгъанды. Аны КъМР-ни  Жарыкъландырыу, илму эм жаш тёлюню ишлери жаны бла министерствосу, республикада кёп функциялы жаш тёлю ара,  Къабарты-Малкъарда добровольческий къымылдауну  регион ресурс арасы эмда  Шимал Кавказны бийик окъуу юйлерини  студентлерини ассоциациясы   къурагъандыла. Анга  ахча бла уа  Жаш тёлюню ишлери жаны бла федерал агентство себеплик этгенди.

 -Кюмюш волонтёрла – жамауат ишлеге тири къатышхан  абадан   адамлагъа айтылады. Ала кеслери ыразылыкълары бла кёп огъурлу ишле этедиле: тюрлю -тюрлю  акцияла къурайдыла, кеслерини проектлерин жашаугъа сингдиредиле эмда алача ишлеген башха жамауат организациялагъа да тутхучлулукъ этедиле,-дегенди добровольческий къымылдауну регион ресурс арасыны директору Светлана Самофалова, жыйылыуну башлай.

Ол республикада кюмюш волонтёрланы саны сексеннге жетгенин, ала кёп башламчылыкъла этгенлерин, аланы толтурур ючюн да иги къармашханларын, федерал даражада ишлеге да тири къатышханларын чертип айтханды.

КъМР-ни  жарыкъландырыу, илму эм жаш тёлюню ишлери жаны бла министр Ауэс Кумыков а Къабарты-Малкъарны кюмюш волонтёрларыны ресурс арасын къурау жаны бла проект грантла ючюн бардырылгъан конкурсну финалына чыкъгъанын билдиргенди.

КъМР-ни профсоюз организацияларыны биригиуюню таматасы  Фатимат Амшокова, урунуу эм социал къоруулау министрни орунбасары Елена Романова, жаш тёлю  волонтёр араланы «Молоды душой» ассоциациясыны  келечиси   Наталья Русакова, Шимал Кавказда вузланы студентлерини ассоциациясыны председатели Азамат Люев эмда Кёп функциялы жаш тёлю араны директоруну орунбасары Жабелланы  Гульнара эм башхала да сёлешип, кюмюш волонтёрлагъа жюрек ыразылыкъларын билдиргендиле, къаллай башламчылыкъларына да себеплик этериклерине ышандыргъандыла.

Жыйылыуну кезиуюнде кюмюш волонтёрлагъа энчи китапчыкъла берилгендиле. Андан сора уа Наталья  Русакова    «Молоды душой» деген  программа бла шагъырейлендиргенди. Анга кёре регионлада ресурс арала ачаргъа, доброволецлени юйретиуню къураргъа белгиленеди, дегенди.

Форумну кезиуюнде социал сетьлени хайырланыу бла байламлы мастер-классла, абадан жыл санда болгъанланы  волонтёр къымылдауларын айнытыугъа, ол ишни къыйматын кётюрюуге жораланнган панел дискуссияла  да болгъандыла. Ахырында уа анга къатышханланы барысына да сертификатла берилгендиле.

«Молоды душой»  битеуроссей форум жыл сайын бардырылады, аллай юйретиу семинарла да къураладыла. Аланы юсюнден бютюн толу хапар билирге сюйгенле  аны молоды душой. РФ деген сайтында табаллыкъдыла.

Холаланы Марзият.
Поделиться: