Адам эм закон

Эсирип, жангыдан къолгъа тюшгенди

ГИБДД-ны Черек районда бёлюмюню инспекторлары «Урвань-Уштулу» жолдан чыкъгъан жерде «УАЗ-3303» машинаны тыйгъандыла. Экспертиза тохташдыргъаннга кёре, аны руль артында олтургъан 50-жыллыкъ аушигерчи киши эсирип болгъанды. Аны къой, машинаны жюрютюрге эркинлик берген къагъытларын окъуна кёргюзталмагъанды.

Полициячыла тинтип башлагъанларында, ол адам алгъын да машинаны эсирип элтгени ючюн Уголовный кодексни 264.1 статьясыны биринчи кесегине тийишлиликде уголовный жууапха тартылгъанын, кесини да аллай къагъытлары сыйырылгъанын тохташдыргъандыла. Бу шартлагъа кёре ол инсанны машинасын тазир стоянкагъа сюргендиле. Аны кесине уа жангы уголовный иш ачхандыла.

Уручула узакъгъа кеталмагъандыла

МВД-ны Чегем районда бёлюмюне 28 октябрьде 62-жыллыкъ киши келгенди. Ол айтханнга кёре, аны аллында кече кимле эселе да Шалушкада орнатылгъан тёлеу терминалны чачып, ичинден 7560 сом урлагъандыла.

Оператив-излеу ишни чеклеринде уголовный розыскны келечилери ишеклик туудургъан адамланы тутхандыла. Ала Урван районда жашагъан, кеслерине да ары дери сюд этилген 20- эм 21-жыллыкъ жашладыла. Бу адамла этгенлерин болгъаныча айтхандыла. Бу шарт бла байламлы уголовный иш ачылгъанды.

Бир кюнню ичинде эки кендирчи тутулгъанды

МВД-ны Зольск районда бёлюмюню келечилери 28 октябрьде Малка элде юйню тинте туруп, халжарда ичи кырдыкга ушаш абериден толу орун тапхандыла. Юйню иеси айтханнга кёре, ол кендирди. Аны ол кеси хайырланырча деп жыйгъанды. Ызы бла бардырылгъан экспертиза анда 249,2 грамм «марихуана» болгъанын кёргюзтгенди.

Ол кюн дагъыда Баксанский элден узакъ бармай полициячыла нарткъалачы 40-жыллыкъ жашха эс бургъандыла. Аны хуржунундан чыгъаргъан газет чулгъамны ичинде 110,6 грамм «марихуана» тапхандыла.

Бу адамланы экисине да уголовный ишле ачылгъандыла.

Къоншу тиширыу уручу болуп чыкъгъанды

Нальчик шахар округда МВД-ны Управлениясына 82-жыллыкъ бу жерли тиширыудан заявление келгенди. Анда айтылгъаннга кёре, аны фатарындан 150 минг сом урланнганды.

Уголовный розыскны келечилери оператив-излеу иш бардырып, ишеклик туудургъан адамны тутхандыла. Ол 26-жыллыкъ тиширыуду, кеси да - аны къоншусу. Бу шарт бла байламлы уголовный иш ачылгъанды. Жаш тиширыугъа уа юйюнден ары-бери кетмезге буйрукъ берилгенди.

Ома

Омарланы Мурат хазырлагъанды
Поделиться: