Мектеплени бла садиклени ашханалары – къаты контрольда

Кёп болмай Роспотребнадзорну Къабарты-Малкъарда управлениясыны келечилери республикада 290 чакълы садикни ашханаларыны болумлары бла шагъырейленнгендиле, - деп билдириледи ведомствону пресс-службасындан.

Бюгюнлюкде школгъа дери билим берген учреждениялагъа 47936 сабий жюрюйдю. Аладан 561 бир къауум сагъатха келгенледиле. Садиклени барысында да жылы азыкъ бла жалчытыу жюз  процентге толтурулады. Ала бла 59 энчи предприниматель келишимлеге кёре жалчытадыла.   

- Быйыл ючюнчю кварталда 34  контроль-надзор иш бардырылгъанды. Аны чеклеринде тюрлю-тюрлю азыкъланы бир кесеклери тинтилгендиле, ол санда физика-химия жаны бла – 26, санитар-химия – 35, микробиология кёрюмдюге кёре – 102 эм хазыр ашладан да санитар-химия анализге 68 алыннгандыла.

Сагъынылгъан кезиуде тогъуз бузукълукъ ачыкъланнганды эмда 42 минг сомгъа тазир салыннганды. Болсада учреждение ишин тохтатырча сылтау белгиленмегенди. Ол санда, аш-азыкъны качествосуна бюсюремей тарыгъыу да этилмегенди.  

 Роспотребнадзордан билдиргенлерича, мындан арысында да садиклени бла школланы ашханаларына дайым къаты контроль этилликди.