Роспотребнадзорну излемлери бузулмазча – къаты контроль

Бахсан районда тюкенледе, кафеледе, маданият аралада эм жамауат аслам хайырланнган башха жерледе Роспотребнадзорну излемлери бузулмазча профилактика халда рейдле бардырыладыла. Муниципалитетде Роспотребнадзорну, администрацияны Экономика эм предпринимательство управленияларыны эм полицияны «Баксанский» бёлюмюню келечилери Заюково, Атажукино эм Исламей элледе бир къауум объектни жокълагъандыла.

Роспотребнадзорну бёлюмюню таматасы Заира Кумыкова кафелени бла сатыу-алыу точкаланы иелерине КъМР-ни Башчысыны буйругъун эсге салгъанды, ол санда санитар-эпидемиология мардаланы бузмазгъа чакъыргъанды. Аны бла бирге вакцинация этерге, медицина маскала бла къолкъапла киерге унутмазгъа, QR–кодлары, справкалары болмагъан алыучуланы жиберирге жарамагъанын да билдиргенди. Администрацияны келечилери ресторанланы бла кафелени иелерине чекле салыннган кезиуде ишлерге жарамагъанын да айтхандыла.

Рейд этилген эки кюнню ичинде РФ-ни Административ бузукъла кодексини 20.6.1-чи статьясыны 1-чи кесегине тийишлиликде 23 протокол жазылгъанды. Анга кёре гражданла 1000-3000 сом эм предпринимательле уа 30000-50000 сом тазир тёлерге керек боладыла.

Эсге сала айтсакъ, мындан арысында да Бахсан районда сатыу-алыу точкалада эм жамауат аслам хайырланнган объектледе кюн сайын рейдле ётерикдиле.