Татьяна Егорова Европа Советни жер-жерли эмда регион властьларыны конгрессини ишине къатышады

Бу кюнледе Страсбургда Европа Советни жер-жерли эмда регион властьларыны конгрессини 41-чи пленар сессиясы барады. Анга Россей Федерацияны делегациясы, ол санда КъМР-ни Парламентини Председатели Татьяна Егорова да, къатышадыла.

Конресс 26 октябрьде ачылгъанды, ары дери уа аны Бюросуну бла политика къауумларыны жыйылыулары болгъандыла. Татьяна Егорова сессияда сюзюллюк баш магъаналы иишлени юслеринден хапарлагъанды:

- Конгресс Европа Советни юч консультатив органларындан бири болгъанын эмда битеулю проблеманы, бирге ишлеуню айнытыуну амалларын сюзер ючюн къуралгъанын эсгертирге сюеме. 41-чи сессия «къатыш» амал бла бардырылады: россейли делегацияны бир кесеги Страсбургдады, башхасы анга видеоконференция халда къошулады.

Хар замандача, сессияда кёп соруулагъа жууапла изленедиле, ол санда миграция бла байламлы проблемаланы, жашау журтланы арендагъа бериуню юсюнден сёз барлыкъды. Регионланы палатасында сюзюллюк сорууланы юслеринден айтханда, мен быланы энчи белгилерик эдим: «Бёлюнмей билим алыуну жаш тёлюню иш бла жалчытыуну амалынча айнытыу – регионлагъа жангы жумуш», Европада регионланы интеграциясын кётюрюуню сейирлеринде регионланы бла чекдеги къыралланы бирге ишлеулери», «Регионла бла диаспорала» эм башхала.

Айхайда, коронавирус инфекцияны тыйыуну амалларына да эс бурулмай къаллыкъ тюйюлдю, Андан ауруп къутулгъанланы саулукъларын къайтарыугъа энчи эс буруллукъду, - дегенди Парламентни Председатели.

Эсгертиу: республиканы законла чыгъарыучу органыны таматасы Европа Советни  жер-жерли эмда регион властьларыны конгрессини Регионла палатасында Россейни келечилерини орунбасарларыны санына эмда «Европаны халкъ партиясы» уллу политика къауумгъа бла Управленияны ишлери жаны бла комитетге да киреди.

Поделиться: