Прокуратура ангылатады

20 эмда 45 жыл толгъанла россейли паспортларын алышындырыргъа борчлудула. Алай ала жангы паспортла алгъынчы, эскилерин 90 кюннге дери жюрютюрге эркиндиле.

Россей Федерацияны Правительствосуну 2021 жылда 15 июльда чыгъарылгъан 1205-чи номерли Бегими бла Россей Федерацияны инсаныны паспортуну юсюнден Болумгъа тюзетиуле кийирилгендиле. Алайды да, 14 жыллары толгъанла биринчи паспортларын алыр ючюн керекли документлени алгъынча 30 кюнню угъай, 90 кюнню ичинде берирге эркиндиле.

2022 жылны 1 июлундан башлап россейли паспортну жарашдырыуну болжалы 5 ишчи кюнден узакъгъа созуллукъ тюйюлдю. Заявленияны адам жашагъан жеринде неда баргъан жеринде бергенини бла къалгъаныны башхалыгъы жокъду. Шёндю адамны жашагъан жеринде паспортну жарашдырыуну болжалы 10 кюндю, къалгъан кезиуледе – 30 кюн.

Хар инсан да паспортуна сакъ болургъа борчлуду. Ол баш магъаналы документни тас этген адам административ жууапха тартылыргъа боллукъду: анга не эсгертирикдиле, неда тазир саллыкъдыла (ст.19.16 КоАп РФ).

Паспортну тас этген адам, олсагъат аны юсюнден Россей Федерацияны Ич ишле министерствосуну жер-жерли органына заявление жазып билдирирге керекди.