«Ол миллетле аралы келишиулюкню кючлендириуге, къыралыбызны бирлигин сакълаугъа энчи юлюш къошханды»

Къабарты-Малкъарны жамауатыны Валерий Коков туугъанлы 80-жыллыгъына аталгъан жыйылыуун башлай, РФ-ни Президентини Шимал-Кавказ федерал округда толу эркинликли келечиси Юрий Чайка Россейни Башчысы Владимир Путинни алгъышлау телеграммасын окъугъанды. Анда былай айтылады:

«Хурметли шуёхла! Сизни, Валерий Мухамедович Коков туугъанлы 80-жыллыгъына аталгъан жыйылыугъа къатышханланы, жюрегимден къызыу алгъышлайма.

Валерий Мухамедович аты айтылгъан къырал эмда жамауат къуллукъчу, арый-тала билмеген, сёзю баргъан адепли адам болгъанды. Россейге, туугъан Къабарты-Малкъарына къуллукъ этиуню ол уллу намысха, битеу жашаууну магъанасына санагъанды. Республиканы Россей Федерацияны куъауумунда айныууна, аны келир заманы ырахатлы болуруна ол уллу къыйын салгъанды, жерлешлерини жашау къолайлыкъларын игилендириуню къайгъысын кёргенди.  

Шимал Кавказгъа, битеу къыралгъа да бек къыйын заманлада уллу кишилик этгенди, ниетинден таймагъанды, алай бла регионда миллетле аралы келишиулюкню, мамырлыкъны кючлендириуге, къыралыбызны жер бирлигин сакълаугъа энчи юлюш къошханды.

Къабарты-Малкъар Республиканы биринчи Президенти Валерий Мухамедович Коковну муратларына, бизге къойгъан ниет хазнасына таянып, ол тутхан жолну андан ары таукел бардыра, сиз мындан ары да иш кёллюлюгюзню тас этмезигизге, регионнга салыннган борчланы тамамлауда жетишимле болдурлугъугъузгъа ийнанама. Бар ахшылыкъланы сизге тежейме, этген муратларыгъызгъа жетигиз!

Поделиться: