Бахсанда КъМР-ни биринчи Президентине эсгертме ачылгъанды

Бахсан шахар округну Дыгулыбгей элини Маданият къаласыны аллында белгили совет, россей къырал эмда политика къуллукъчу Валерий Мухамедович Коковха эсгертме салыннганды. Аны ачылыууна Къабарты-Малкъарны Башчысы Казбек Коков, Къарачай-Черкесни оноучусу Темрезланы Рашид, РФ-ни Федерал Жыйылыууну Федерация Советини членлери, Къырал Думаны депутатлары да къатышхандыла.

Эсгертмени ачыуну сыйлы жумушу Къабарты-Малкъарны Башчысы Казбек Коковха бла Къарачай-Черкес Республиканы Башчысы Темрезланы Рашидге буюрулгъан эди. Ызы бла гюлле салыу болгъанды. Айтхылы къырал къуллукъчуну биргесине тюрлю-тюрлю жыллада ишлеген адамла уа Валерий Мухамедовични жылы сёзле бла эсгергендиле.

Республиканы биринчи Президентине эсгертме салыуну башламчысы Бахсанны жамауаты болгъанды. Аны Станислав Катони ишлеп бергенди.

Валерий Мухамедович Коков 1941 жылны 18 октябринде Тырныаууз шахарда туугъанды. Къабарты-Малкъар къырал университетни экономика факультетин,  Эл мюлкню битеусоюз илму-излем институтуну аспирантурасын, Дондагъы Ростовда бийик партия школну  бошагъанды. Экономика илмуланы кадидаты эди.

Урунуу жолун ол Бахсан районну «Трудовой горец» колхозунда баш агроном болуп башлагъанды. Андан сора тюрлю-тюрлю къуллукълада уруннганды: КПСС-ни республикалы комитетини биринчи секретары, Къабарты-Малкъар АССР-ни Баш Советини Председатели, Федерация Советни члени. 1996-2001 жыллада – Федерация Советни Председателини орунбасары. 1992-2005 жыллада – Къабарты-Малкъар Республиканы биринчи Президенти.

 Октябрь Революцияны, Урунууну Къызыл Байрагъыны, Халкъланы шуёхлукълары, Ата журтну аллында къыйыны ючюн экинчи эмда ючюнчю даражалы орденле бла саугъаланнганды.