Полицияны автопаркы жангыртылады

Бу кюнледе Нальчикде Келишиулюкню майданында  КъМР-ни Къырал автоинспекциясыны келечилерине 41 жангы  Hyundai Solaris патруль машина берилгенди. Ала жангы излемлеге толу келишедиле, алай эсе уа, жоллада право низамны сакъларгъа уллу себеплик этерикдиле. Бу иш федерал эм миллет проектлени чеклеринде тамамланады. Аны юсюнден бизге ведомствону пресс-службасындан билдиргендиле.

Алай бла, бу жол жангы автотранспортну ГИБДД-ны муниципалитетледе  онбир бёлюмю алгъанды. Аладан ачхычланы КъМР-ни Башчысы Казбек Коков бла республиканы ич ишлерини министри полицияны генерал-майору Василий Павлов бергендиле. Аны бла байламлы къууанчха Чегем районну жаш жол инспекторлары (ЮИД) бла полицияны биринчи кадет классыны келечилери да къатышхандыла.

- Бюгюн «Къоркъуусуз эм тынгылы  жолла» миллет проектни хайыры бла республиканы жол инфраструктурасын игилендириу жаны бла иги кесек иш этиледи. Ол санда аварияланы санын азайтырча мадаргъа аслам эс бурулады. Бу жаны бла баш борчладан бирин ГИБДД-ны келечилери толтурадыла. Мындан арысында да сиз кючюгюзню аямай кюреширсиз деп бек ийнанама. Жангы техника уа къуллугъугъузну жетишимли бардырыргъа себеплик этерикди. Къыйын ишигизде бет жарыкълы урунуругъузну сюйгеними билдиреме эм саулукъ-эсенлик тежейме, - дегенди Казбек Коков. 

Поделиться: