Къабарты-Малкъарда алтын чыгъарылгъан уллу жер тинтиледи

«Хазнала жаны бла къырал комиссияны оноууна кёре федерал магъаданланы фондуна кирген Б. К. Михайлов атлы чыгъарылгъан жерде 87 719 килограмм ёлчемде С1+С2 категорялы магъадан алтын байлыкъла къабыл кёрюлгендиле эм къырал эсепге салыннгандыла», - деп айтылады Росгеологияны сайтында.

«ГКЗ-ны оноууну тюзлюгюн жаланда Шимал Кавказда угъай, Россейни битеу Европалы жанында алтынны эм уллу чыгъарылгъан жерин Къабарты-Малкъарда ачхан Росгеологияны специалистлери билдиредиле, - деп чертгенди Росгеологияны генеральный директору – правленини председатели Сергей Горьков. – Бу айтхылыкъ жетишим фахмулу геолог Борис Константинович Михайдовну итиниулюгюню хайырындан болгъанды, ол регионда алтынны излерге кереклисине ишекли болмагъанды, эм жангы чыгъарылгъан жерге аны аты аталгъанды».

«Геолог-экономика жаны бла багъа бериу чыгъарылгъан жерни бийик файдалылыгъын кёргюзтеди. Мында жылгъа 3,6 миллион тонна чыгъаргъан эм жарашдыргъан кючю болгъан предприятие ишлерге онг барды, ол а Къабарты-Малкъар Республиканы экономикасын айнытыугъа тийишли юлюш къошарыкъды», - деп белгилегенди Росгеологияны таматасы.

Ол тийрени энчиликлерине къарап, 2021 жылда Росгеологияны специалистлери Б.К. Михайлов атлы чыгъарылгъан жерде алтын хазананы битеу санауларын тамамлагъандан сора, къырал контрактха кёре, аны болжал халда тинтиулерин бардыргъан ТЭО къуралгъанды.  

Магъадан тийрелени тау-геология эм тау-техника болумларын эсге алып, ТЭО-да ачыкъ халлы чыгъарыу амалны дурус кёргенлерин билдиргендиле. Магъаданланы тюзюнлей сорбционный цианирование амал бла жарашдырып, 85,5 процент болумда алтынны чыгъарыу технология ыз къуралгъанды. ТЭО-гъа кёре, чыгъарылгъан жерни битеу ишлеген заман болжалында таза хайырлылыгъы юч миллиард сом чакълы бир боллукъду. Инвестицияланы къайтарылыуларыны заманы жети жылдан кёп боллукъ тюйюлдю, деп айтылады билдириуде.

Михайлов Борис Константинович (1950-2020) – Новосибирск къырал университетде билим алгъанды, 50 жыл геолог сынамы болгъанды. Жыйырма жылдан артыкъны Магъадан областьде ишлегенди, геофизический отрядны геологундан Табийгъат байлыкъла комитетни таматасыны орунбасарына дери ёсгенди. 2001 жылдан 2012 жылгъа дери федерал ведомстволада уруннганды, РФ МПР-ни минерал-сырьё управлениясыны, Роснедр ТПИ-ни геология управлениясыны таматасы болгъанды. 2012-2015 жыллад – ЦНИГРИ-ни директору. 2015 жылдан башлап «Росгеология» АО-да ТПИ-де геология-тинтиу ишле жаны бла директор, 2019 жылдан – генеральный директорну орунбасары – ТПИ-ни геология бёлюмюню таматасы.

«Б.К. Михайлов атлы алтын чыгъарыу жер» Тырныауузну вольфрам-молибден чыгъарылыу жерини шимал-шаркъ жанында 2200-2600 метр бийикликде орналыпды. Чыгъарылыу жерни чегинде тюрлю-тюрлю халлы 17 магъадан тийре белгиленнгенди, аланы узунлукълары 60-150 метрден 800-900 метрге дериди эм кючлери 20-30 метрден 120-155 метрге дери жетеди. Тереннге кетиуюлери 300 метр чакълы бирди. Алтынны болгъаны орталыкъ ёлчемде, ТЭО белгилеген хайырлы компонентни болумуна кёре, тоннагъа 1,56 граммды.  

Гитче-Тырныаууз магъадан майданны чегинде алтынны болгъанына бла къалгъанына къарау ишле жыйырманчы ёмюрню 60-чы жылларында башланнгандыла, алай хазна айнымагъандыла. Жыйырма биринчи ёмюрде 2010 жылдан 2015 жылгъа дери ишле «Каббалкгеология» ООО-ну кючю бла къырал контрактланы чеклеринде бардырылгъандыла. 2018-2021 жыллада магъадан алтынны болумуна къарау жумушланы «Шимал-Кавказ ПГО» АО-ну ишчилери къырал контрактны чегинде тамалагъандыла.

Поделиться: