Ёмюрлени теренинден къуралгъан тёрелеге кертичидиле

Ич ишле министерствону миграцияны соруулары жаны бла бёлюмлерини къуллукъчулары профессионал байрамларын белгилейдиле.

Бу бёлюмню тарыхы уа байды. Юч ёмюр мындан алгъа Патчах Пётр Сенатха указын бергенди. Алай бла Россейге келген тыш къыраллыланы эсепге алыу, аланы ишлерине къырал контроль тамамлау жаны бла системаны мурдору салыннганды. Андан бери озгъан жылланы ичинде бу бёлюмге бир ненча тюрлениулеге тёзерге, жангыртыуладан ётерге тюшгенди. Болсада аны къуллукъчулары ёмюрлени теренинден къуралып келген тёрелеге бюгюн да кертичилей къаладыла.

СССР-ни заманында инсанланы эсепге салыр, адрес справкаланы берир мурат бла милицияны шахар бёлюмлеринде адрес бюрола бла адрес столла къуралгъан эдиле. Ызы бла уа визала бериуге эмда тыш къыраллыланы эсепге алыугъа жууаплы бёлюмле да ишлеп башлагъандыла.

Совет къырал чачылгъандан сора миграция политикада тюрлениуле башланнгандыла. Ол санда паспорт-виза службагъа инсанлыкъ бла байламлы сорууланы тамамлау жаны бла жууаплылыкъ берилгенди. Россейни Урунуу министерствосунда Халкъны миграциясы жаны бла комитет къуралады. Ызы бла ол Федерал миграция службагъа тюрлендириледи.

Шёндюгю заманда уа миллет къоркъуусузлукъну жалчытыуда жангы мадарла изленнгендиле. Алай бла РФ-ни президентини указы бла 2016 жылда 5 апрельде ФМС-ни иши тохтатылып, аны борчлары Ич ишле министерствогъа берилгендиле. 2017 жылда ведомстволу буйрукъ чыгъарылып, 11 сентябрь РФ-ни МВД-сында миграция системаны соруулары жаны бла бёлюмлени кюнюча белгиленириги тохташдырылады.

Бюгюнлюкде РФ-ни президентини башламчылыгъы бла къырал миграция политикада тюрлениуле бардырыладыла. Ол санда административ тыйгъычла кетериледиле, къырал жумушланы тамамлауну качествосу игилендириледи, инсанлыкъ бериуню институту жангыртылады, миграция низамда женгилликле этиледиле. Тыш къыраллада жашагъан бир журтлуларыбызны ата-бабаларыны журтларына къайтарыугъа себеплик этиледи, ол санда къырал гарантияла, социал болушлукъ бериледи.

Битеу бу жумушла бла бирге аманлыкъланы профилактикасы жаны бла хайырлы мадарла да толтуруладыла.

Пандемия эмда аны бла бирге кийирилген чекле миграция службаны ишинде тюрлениуле болдургъандыла. Бу кезиуде борчланы дистанциялы халда толтурургъа юйренирге тюшгенди. Битеу чырмаулагъа да къарамай, миграция бёлюмле къырал жумушланы кемчиликсиз бардыргъандыла. Къырал чекле жабылгъанлары ючюн ата журтларына кеталмай къалгъан тыш къыраллыланы праволу болумларын тохташдырыу жаны бла мадарла да толтурулгъандыла.

КъМР-де ич ишле министр полицияны генерал-майору Василий Павлов да алгъышлагъанды миграция бёлюмню къуллукъчуларын бла ветеранларын. «Бюгюнлюкде сизге салыннган борчланы арасында кёп магъаналы соруула бардыла. Ол санда урунуу миграцияны къурау, россейли инсанлыкъны бериу эм башхала. КъМР-де Ич ишле министерствода миграцияны соруулары жаны бла бёлюмню къуллукъчулары бу борчларын бийик даражада толтурадыла», - деп айтылады аны алгъышлауунда.