СНИЛС бла байламлы жангы амалла

СНИЛС-ни – электрон халда

Къагъанакъгъа СНИЛС бла аналыкъ капиталгъа электрон сертификат ананы къырал жумушланы порталында энчи кабинетине жибериледиле. Алай ала бу амал бла хайырланыр ючюн, порталда эсепге тюшерге керекди. Бу жумуш, артда заман къоратылмазча, сабий туугъунчугъа дери толтурулса игиди.

2020 жылдан башлап аналыкъ капиталгъа сертификат электрон халда жарашдырылады, башхача айтханда, аны алыр ючюн ведомствогъа заявление жазаргъа, документле жыйып берирге керек тюйюлдю. Сабий туугъанлай, ЗАГС органла аны юсюнден Пенсия фондха билдиредиле. Фондну ишчилери юйюр сертификатны алыргъа эркин болгъанын бла къалгъанын тохташдырадыла. Капиталны берирге оноу этилсе, аны юсюнден информация ананы порталда энчи кабинетине  жибериледи.

Къагъанакълагъа СНИЛС да бу халда бериледи, аны лицевой счётуну страховой номери ананы кабинетине ийиледи.

СНИЛС-ни алыуну эм алышындырыуну амаллары

Жыл сайын 5 миллион адам, Россейни Пенсия фондунда (ПФ) эсепге тюшюп, СНИЛС-ни аладыла. Ол инсаннга,  пенсияны тохташдыргъан кезиуден сора да, электрон халда къырал жумушланы тамамлагъанда, льготаланы алгъанда, тюрлю-тюрлю жумушланы толтургъанда, документлени санын азайтыргъа керек боллукъду.

14 жылы толмагъан сабийни энчи учётда эсепге салыр ючюн, аны атасы неда анасы кеслерини паспортлары эм  гитчени туугъаныны юсюнден шагъатлыкъ къагъыт бла фондну жер-жерли бёлюмюне неда Кёп жумушланы тамамлагъан арагъа (МФЦ) келирге  боллукъдула. Сабийге 14 жылы толгъан эсе, ол ПФ-ха паспорту бла кеси барып, СНИЛС-ни алаллыкъды.

Балалары 2020 жылны 15 июлюндан сора туугъан ата-аналадан фондха неда МФЦ-гъа барырлары изленмейди. ЗАГС-дан ПФ-ну информация системасына сабий туугъаныны юсюнден билдириу келгенлей, анга СНИЛС олсагъатлай этилликди,  аны номери ананы энчи кабинетине ийилликди. Болсада  бу амал бла жангыз да къырал жумушланы порталында эсепге тюшген ата-анала хайырланаллыкъдыла.

Сабийни интернатдан алып ёсдюргенле фондха барыргъа керекдиле, алагъа алгъыннгы жорукъла сакъланадыла

Абаданла кеслерине энчи страховой номерлерин эки амал бла алаллыкъдыла: ишге киргенде эм фондха неда МФЦ-гъа барып.

СНИЛС инсаннга жангыз бир кере бериледи, аны номери тюрлендирилмейди. Адам документни тас этген эсе, аны талай амал бла къайтарыргъа боллукъду. Ишлей эсегиз, кадрла бёлюмге документни жангыртыуну юсюнден заявление жазаргъа керексиз. Иш бла кесигизни кесигиз жалчыта (энчи предприниматель, авдвокат, нотариус) неда ишсиз эсегиз, аллай заявленияны фондха неда МФЦ-гъа барып, толтуругъуз. Бу жумушну фондну сайтында гражданинни энчи кабинетинде тамамларгъа да боллукъду.

СНИЛС-де жазылгъан данныйле паспортда болгъанлары бла толусунлай келиширге тийишлидиле. Адам тукъумун алышындыргъан эсе, МФЦ-гъа неда фондну жер-жерли бёлюмюне барып данныйлерин тюрлендириуню юсюнден заявление жазаргъа керекди.