Миллетлени арасында байламлыкъланы кючлерге алланып

Кёп болмай Минаральные Воды шахардагъы Экспоцентрде «Маяки дружбы. Башни Кавказа. Россия сближает - 2021» деген волонтёрланы тёрели бешинчи халкъла аралы фестивальлары ачылгъанды. Бу жол анга Россейни регионларындан эм жууукъ тыш къыралладан да алтмышдан аслам жаш адам къатышханды.

Проектни магъанасы регионлада эм тыш къыраллада жашагъан  миллетлени арасында байламлыкъланы, шуёхлукъну кючлергеди. Ол бир жолгъа Ставропольда, Чеченде, Шимал Осетияда, Къарачай-Черкесде, Ингушетияда, Къабарты-Малкъарда эм Дагъыстанда да бардырыллыкъды. Волонтёрла специалистлеге эсгертмелени, къалаланы,  килисаланы, жолланы,скверлени жангыртыргъа болушурукъдула, мастер-класслагъа, экскурсиялагъа къатышып, миллетлени маданият-тарых хазналары бла да шагъырейленирикдиле. Экология болумгъа да аслам эс бурлукъдула.  

Проект 2016 жылда башланнган «Маяки дружбы» акцияны барыууду. Анга миллетлени арасында байламлыкъны кючлеу жаны бла кюрешген студентле, власть органла, жамауат организацияла эм башхала да къатышадыла.

Бу кюнледе уа КъМР-ни Граждан обществону институтлары бла байламлыкъла жюрютюу эмда миллетлени ишлери жаны бла министерствосунда волонтёрланы проектлерини жабылыу болгъанды. Ала республиканы бек жаратханларын билдиргендиле. Этилген ишлени эсеплегендиле эм жангы проектлерин да ачыкълагъандыла.

Ведомствону таматасыны къуллугъун толтургъан Анзор Курашинов миллетлени арасында байламлыкъланы, шуёхлукъну кючлеуде быллай проектлени уллу магъанасы болгъанын белгилегенди. Ахырында къонакълагъа эсде къалырча саугъала да берилгендиле.  

Программагъа кёре, бу жол жаш адамла Нальчик бла шагъырейленнгендиле, ол санда «Махтаулукъну ёмюрлюк отуна» гюлле салгъандыла, Элбрусда, Чегемде эм Черек районлада да болгъандыла. Аны чеклеринде мастер-класслада  кийиз басаргъа, сауут-саба ишлерге да юйреннгендиле. Тюрлю-тюрлю экология акциялагъа, КъМР-ни Волонтёр тебиуню айнытыу арасы бардырып «тёгерек столгъа» да къатышхандыла.

Проект СКФО-ну бирси регионларында да барады. Ол 19 августда Махачкъалада къууанч халда жабыллыкъды. Анда делегацияла тюрлю-тюрлю темалагъа жораланнган проектлерини презентациясын ётдюрлюкдюле.