Жаш адамла терроризмге къажау болгъанларын айтхандыла

Жаш адамланы террорист организациялагъа къалай тартханларыны, социальный сетьледе бу терслик иш бла кюрешгенлени къалай таныргъа боллугъуну, аланы ыргъакъларына тюшмез ючюн не зат этерге кереклисини юслеринден баргъанды ушакъ бу кюнледе Къабарты-Малкъар къырал университетде къуралгъан жыйылыуда.  Аны юсюнден бизге вузну пресс-службасындан билдиргендиле.

Алгъаракълада Нальчикде Александровка микрорайонда Россейде ишине чек салыннган ИГИЛ террорист организацияны экстремист къауумуна кирген юч жаш адам ёлтюрюлгендиле. Право низамны сакълаучу органланы шартларына кёре, ала КъМР-де терактла хазырлагъандыла. Аладан бек таматагъа жаланда 33 жыл толгъан эди.

Жыйылыуну къурагъанланы айтханларына кёре, быллай болум къуру кавказ республикалада тюбемейди. Террорист организациялагъа тартылгъанланы орталыкъ жыл санлары 22-ге жетеди. Бюгюнлюкде уа ёсюп келген тёлюню экстремист ниетлеге юйретиу профессионал халда бардырылады. Асламында дин бла башларын жулуп, жаш адамланы тюз жолдан тайдырыргъа излегенле Интернетни, социальный сетьлени хайырланадыла. Аланы ётюрюк сёзлерине тюшмез ючюн а жаш адамлагъа сакъ болургъа, дунияда болумгъа эс бурургъа тийишлиди, деп чертгенди тюбешиуню  башламчыларындан бири РФ-ни МВД-сыны Нальчик шахарда бёлюмюню акъылбалыкъ болмагъанланы ишлери жаны бла инспектору Галина Яковлева.

Студетлеге аманлыкъчыланы ётюрюк сёзлеринден къалай сакъланыргъа  кереклисине КъМР-де МВД-да Жамауат советни келечиси «Юйюгюзге мамырлыкъ» жандауурлукъ организацияны таматасы Суфадин Шибзухов, республиканы муфтийини орунбасары  «Помоги ближнему»   волонтёр организацияны  башчысы Алим Сижажев, Пятигорскну эм Черкесскни христиан епархиясыны КъМР-де дин билим бериу бёлюмюню башчысы Константин Осипов, Нальчикни администрациясыны физкультура, спорт эм жаш тёлюню ишлери жаны бла управлениясыны баш специалисти Бачиланы Расул, КъМР-де МВД-ны экстремизмге къажау арасыны бёлюмюню оперуполномоченныйи полицияны подполковниги Геккиланы Марина, полицияны капитаны Люберд Кармов юйретгендиле.

«Охотники за головами» деген документли кинону кёргюзтгенден сора уа дин къуллукъчула жаш адамла бандит къауумлагъа не сылтау бла тюшгенлерини юслеринден кеслерини оюмларын айтхандыла.

Сёз ючюн, Константин Осиповну акъылына кёре, биринчиден, ол жамауатны болуму бла байламлыды. «Жаш тёлю экстремистлени ызларындан аланы эркин заманлары къуралмагъаныны хатасындан барадыла. Ала жамауатха, къауумлагъа къошулургъа излейдиле»,-дегенди ол эмда жаш адамланы жууукъларын, тенглерин хурметлерге, бизни Жаратханны сюерге чакъыргъанды. «Игиликни, ырахматлыкъны жайсагъыз, сизге жууап да аллай боллукъду»,-деп къошханды ол.

Алим Сижажев а жашланы бла къызланы бирлени сёзлерине ийнанып къалмай, кеслерин оюмларгъа, сагъыш этерге чакъыргъанды. «Аманлыкъны этгенде Аллахны сагъыннган уллу гюняхды. Аллаху тала бизни ариулукъгъа, ырахматлыкъгъа чакъырады, урушугъуз, бузугъуз деп айтмайды. Сизге башхала иги болурун сюе эсегиз, кесигиз да ахшылыкъла этигиз. Ма ол заманда боллукъду тюзлюк»,-дегенди ол.

Муфтийни орунбасары жашауда тюз жолланы сайларгъа, социальный сетьледе аманлыкъгъа чакъыргъанланы ызларындан бармазгъа кереклисин айтханды. «Алагъа адам – товарды. Бизни уа дунияны тюрлендирирге онгубуз барды. Жаланда хар атламыбыз ючюн жууаплы болуп, ахшылыкъгъа  тартынсакъ, тёгерекдеги дуния да алышынырыкъды»,-деп белгилегенди дин къуллукъчу.

«Юйюгюзге мамырлыкъ» жамауат организация республикада тынчлыкъны сакълауну магъанасын ангылатыр мурат бла къуралгъанды, деп чертгенди аны башчысы Суфадин Шибзухов. Ол таматала жаш тёлюню  келир жашаулары ючюн къайгъыргъанларын да белгилегенди.

Ызы бла «Память сильнее времени» деген фильм кёргюзтюлгенди. Анда уа  террористлени къолларындан ёлген мамыр адамланы, право низамны сакълаучуланы юслеринден айтыла эди.

Магъаналы ушакъны ахырында студентле къолларындан тутуп, терроризмге къажау болгъанларын билдиргендиле.