Къырал саулукъларына кёре чекленнген онглары болгъанлагъа себеплик этеди

Къыралда сакъатлагъа реабилитациягъа керекли оборудование, бир-бир социал мадарла да сакъат эсепге тургъан жерде  бла бирге ол шёндю жашагъан жерде да берилликдиле. Ол жаны бла федерал закон быйыл  февральда кючюне киргенди. Аны бла бирге саулукъларына кёре чекленнген онглары болгъанлагъа къыралда къаллай социал льготала тохташдырылгъандыла? Аланы юсюнден статьяда окъугъуз.

Стаховой пенсияла

1-чи, 2-чи, 3-чю къауумгъа кирген сакъатлагъа страховой пенсия тёленеди – стаж бар эсе. Ахча сакъатлыкъ къачан эм не сылтау бла тохташдырылгъанына  къарамай тёленеди. Дагъыда адам ишлегени бла къалгъаны да эсге алынмайды.

Страховой     пенсия алыр ючюн Пенсия фондну бёлюмюне неда МФЦ-гъа заявление жазаргъа тийишлиди. 

РФ-ни Къырал Думасыны депутатлары пенсияланы заявление бермей тохташдырыуну юсюнден законну къабыл кёргендиле. Алай бла энди сакъатлагъа неда жыл саны жетгенлеге социальный эм страховой пенсияны,  регион тёлеулени алыр ючюн  заявление жазаргъа, документлени жыяргъа керек боллукъ тюйюлдю. Бу жумушла автоматизацияланнган мадар бла толтуруллукъдула. Закон кючюне 2022 жылда 1 январьда кирликди.

Пандемияны кезиуюнде саулукъларына кёре чекленнген онглары болгъанлагъа себеплик жаны бла законла да къабыл кёрюлгендиле. Сёзге, РФ-ни Урунуу министерствосу бла бирге сакъатлыкъны болжаллы халда заочно тохташдырыуну низамы хазырланнганды. Аны бла льготаланы биринчи кере тохташдыргъанла неда аны къайтарып алгъанла да хайырланыргъа боллукъдула. Бу низамны болжалы быйыл 1 октябрьге дери созулгъанды.

 Социал жумушла

Саулукълары осал болгъан сабийлеге дарманла, медицина керекле, саулукъгъа жараулу аш-суу бериледи. Аурууну багъар мурат бла санаторийлеге-курортлагъа путёвкала юлешинедиле, медицина учреждениягъа баргъанда пассажир транспортха билетле хакъсыздыла. 

Бу социал болушлукъну орунуна саусуз ахча алыргъа эркинди. Жаланда аны юсюнден Пенсия фондну бёлюмюне заявление жазаргъа керекди.

Жашау журт-коммунал, парковка ючюн льготала

Сакъатлагъа, саулукъларына кёре чекленнген онглары болгъан сабийлени юйюрлерине жашау журт-коммунал жумушла ючюн тёлеулени жартысы артха къайтарылады. 

1-чи эм 2-чи къауум сакъатлыкъ тохташдырылгъанлагъа налог тергеу бериледи – 500 сом. Ол налог кезиуню хар айына тергеледи.

Саулукъларына кёре чекленнген онглары болгъанла неда аланы ашыргъан  водительле машиналарын шахарда къалайда да хакъсыз салыргъа боллукъдула. Былтыр 1 июльда кючюне кирген жорукълагъа тийишлиликде, машинаны  хакъсыз къояргъа жарагъаныны юсюнден эркинлик документ хазырлар кереклиси жокъду.  Транспортну юсюнден шартла  федерал тизмеде бардыла. Алай машинаны ары кийирир ючюн МФЦ-гъа заявление жазаргъа керекди.

Реабилитация техника

Реабилитация кереклени сатып алыргъа сертификатла кийирилгендиле. Бу амал бла быйыл кюз артындан башлап хайырланыргъа жарарыкъды. Алай бла   реабилитация техниканы сайларгъа эркинлик берилгенди,  аны багъасы уа сертификат бла тёленирикди. Дагъыда бир жангычылыкъ: аналыкъ капиталны ахчасын   реабилитация техниканы сатып алыргъа къоратыргъа жарарыкъды.

 Кючюне кирген федерал законнга тийишлиликде,   реабилитациягъа керекли техниканы инсан шёндю жашагъан жеринде алыргъа боллукъду. Алгъын а аланы  сакъат эсепде тургъан жеринде алгъанды. Сакъатлагъа хакъсыз протез, коляска, алача башха керекле бериледиле.

Эсигизге салайыкъ, былтыр кючюне кирген федерал законнга кёре, коляскада жюрюген адамгъа концертге, рестораннга кирирге къоймагъан учреждениягъа тазир салынырыкъды. Адамны саулугъу осал болгъаны ючюн товарны сатаргъа, жумушларын, излемлерин толтурургъа унамагъанла административ жууапха тартыладыла. Быллай бузукълукъ этген жууаплы къуллукъчу 30-50 минг сом, организация уа 300-500 минг сом тёлерикди.