Аманлыкъчыла ачыкъланнгандыла

 Жорукъланы бузгъанны ахыры – тутмакъ

Урван районну прокуратурасы жолда авария этген инсаннга ачылгъан уголовный ишни къабыл кёргенди. Ол Россейни УК-сыны 264-чю статьясыны 5-чи кесегине кёре терсленеди – жолда жюрюуню жорукъларына бузукълукъла этип, сунмай эки  эм андан кёп адамны ёлтюргени ючюн.

Авария «Кавказ» федерал жолда болгъанды. Терсленнген адам, жорукъланы бузуп, башха машина бла къагъышханды.  Алгъан жараладан  экинчи машинаны водители бла биргесине келген эки адам ауушхандыла.

 Сюд водительни терслигин тохташдыргъанды. Ол 3 жылны бла 6 айны колония-поселенияда турлукъду. Аны  машинаны жюрютюрге эркинлиги юч жылгъа сыйырылгъанды.

Къуллугъун кесине таплыкъгъа хайырланнганды

Урван районну администрациясыны архитектура эм шахар къурулуш жаны бла управлениясыны башчысына ачылгъан терслеу материалла сюдню къараууна берилгендиле.  Муниципал къуллукъчу РФ-ни УК-сыны 159-чу статьясыны 3-чю кесегине бузукълукъ этгенине ишеклик барды – хыйлачылыкъ, башхача айтханда, къуллугъун кесине таплыкъгъа хайырланып, башханы мюлкюн урлагъаны ючюн.

Следствие ачыкълагъаныча, управленияны таматасы муниципалитетге болушлукъ керекди деген сылтау бла   сатыу-алыу комплексни иесинден ахча алгъанды. Алай аны ол кеси кереклерине къоратханды.

Быллай аманлыкъ этгенни эркинлиги алты жылгъа дери сыйырылыргъа боллукъду,  деп ангылатхандыла бизге республиканы прокуратурасындан.

Тикаланы Фатима хазырлагъанды.
Поделиться: