Айнытыуну бирикдирилген институту къырал болушлукъну «бир терезе» амал бла тамамларгъа онг берликди

Россейни Правительствосуну айнытыу институтланы ишлерин игилендириу жаны бла буйругъу бла   быйыл апрельде «Шимал Кавказны айнытыуну корпорациясы» эмда «Эльбрус курорт» акционер обществола ишлерин тохтатхандыла. Аланы борчларын энди айнытыуну бирикдирилген институту толтурлукъду. Ол «Шимал Кавказны  курортларыны» мурдорунда ишлерикди, деп билдиргендиле КСК-ны пресс-службасындан.

Бу жангы структура курортлада инфраструктураны игилендириу, энчи экономика зоналаны ишлерине башчылыкъ этиу жаны бла борчланы тамамларыкъды. Экономикада, туризмде, промышленностьда, эл  мюлкде инвестиция проектлени жашауда бардырыугъа ахчаны  юлешиу да аны жууаплылыгъындады.

Эки акционер обществону да бирикдириуге надзор органла эркинлик бергендиле. Компанияланы директорларыны совети, акционерлерини болжалдан аллы жыйылыулары бардырылгъандыла. Аны бла бирге КСК-ны бла КРСК-ны ишчилерин къысхартыу, Шимал Кавказны курортларыны къошакъ акцияларын къырал эсепге салыу мадарла толтурулгъандыла. 

Жууукъ кезиуде акционерлени жыйылыуларында айнытыуну бирикдирилген институтуну уставыны жангы редакциясын къабыл кёрюллюкдюле, аны уставной капиталы эм аты тюрленирикдиле.

Эсигизге салайыкъ, «Шимал Кавказны айнытыуну корпорациясы» 2010 жылдан бери ишлейди. Аны баш борчу – регионда инвестиция болумну игилендириу, инфраструктура проектлени тамамлауду. Бу кезиуде     корпорация  16 инвестиция проектге ахча бёлгенди.

«Шимал Кавказны курортлары» общество  да 2010 жылда къуралгъанды. Аны иши турист-рекреация жерлени айнытыу, СКФО-ну субъектлеринде турист-кластерге башчылыкъ этиу бла байламлыды, ол санда Къарачай-Черкесде «Архыз», Чеченде «Ведучи» эм  Къабарты-Малкъарда «Эльбрус» курортлада.

Экспертлени акъылларына кёре,   Шимал Кавказны айнытыуну бирикдирилген институтун къурау къырал болушлукъну «бир терезе» амал бла тамамларгъа онг берликди, ол санда гитче  эм орталыкъ бизнесни субъектлерине  себепликни.

Шимал-Кавказ къырал университетни ректору Дмитрий Беспаловну айтханына  кёре, регионну айнытыу жаны бла къырал программала КСК-ны, КРСК-ны эмда «Посети Кавказ» фондну юслери бла толтурулгъандыла. «Бирикдирилген институт регионда болгъан битеу онгланы, республикаланы айнытыуну стретегияларын бирикдирлиги магъаналыды. Бу ишге Шимал Кавказны вузларыны кёп болмай къуралгъан консорциумун къатышдырыргъа керекди. Алай бла институт бла консорциум эксперт-аналитика ишни бардыраллыкъды, инвестиция стратегияланы сюзаллыкъды»,-дегенди ол.