Ачыкъ эшиклени кюню

Бу кюнледе  ФСИН-ни КъМР-де Управлениясыны  4-чю  номерли колониясында  тургъанлагъа ата-аналары эмда башха жууукълары бла тюберге онг берилгенди. Сёзсюз, аллай тюбешиу эки жанына да бек къыйынды, болсада ол  тамбылагъы кюннге  ышаныулукъ береди.

Бу жол колониягъа  жыйырмадан аслам  адам келгенди. Ала   тутулуп тургъанланы  жашагъан болумларын, не ашагъанларын, не ишлегенлерин, бош заманларында не этгенлерин да  билгендиле. Аллай шагъырейлениуден  сора уа,  жууукъла бир бирлери бла энчи олтуруп, чай да иче, хапарлашхандыла.

-Тутмакълагъа быллай кюн бек магъаналыды. Жуукълары бла тюбешгенлеринден сора адам кёп затны юсюнден сагъыш этеди,  аны  юйюнде ашыгъып сакълагъанларын сезеди, алай эсе уа  жамауатны арасында  тюз ниетли инсан болур онгу  да барды, -  дегенди  колонияны таматасыны орунбасары Бийланы Хафисат.