Гриппден сегизеулен ауругъанды

Роспотребнадзорну КъМР-де Управлениясындан билдиргенлерича, бизни республикада грипп эмда ОРВИ бла ауругъанланы саны озгъан ыйыкъда эпидемия мардадан 61,5 процентге аз болгъанды. Нальчикде уа бу кёрюмдю 13,8 процентди.

Сагъынылгъан ауруулагъа бу кезиуде 387 къагъанакъ сабий (0-2  жыллыкъла) жукъгъандыла. Аладан таматаракъ тёлюде (3-6 жыл) - 900, 7-14 жыллыкъланы арасында - 681, онбеш жыл эм андан таматалада уа - 526 шарт  ачыкъланнганды. Бу тарихле республика быллай аурууланы кенг жайылыуундан (эпидемиядан) узагъыракъда болгъанын кёргюзтедиле. Алай дагъыда Бедикде сабий садикни уа бир ыйыкъгъа жабаргъа  тюшгенди.

Бу кюнлеге лабораториялада бардырылгъан тинтиулени кезиуюнде гриппден ауругъан сегиз шарт ачыкъланнганды. Аладан тёртюсю аурууну В тюрлюсюдюле, энтта да тёртюсю уа H1N1 (A) тюрлюсю.

Ведомствону специалистлери болумгъа мындан арысында да дайым кёз-къулакъ болгъанлай турлукъдула. Кеслери да хар кимге да саулугъуна сакъ болургъа кереклисин эсгергендиле.