Кесине, туугъан жерине да хайыр келтире…

Бизни республиканы жери, бийик тауладан, терен кёлледен, терк черекледен сора, иш кёллю, къармашыулу адамладан да байды. Османланы Тахир аладан бириди. Ол, Прохладна районда Виноградное элде ферма къурап, малла тутады.

Жерчиликге, малчылыкъгъа, урунуугъа сюймекликни атасындан - уллу эл мюлк предприятияны таматасы Османланы Керимден алгъанды. Аграр ишде биринчи атламланы жаш аны болушлугъу бла этип башлагъан эди. Алай бла жети жыл мындан алгъа Тахир предпринимательство бла кюреширге таукел болады. Виноградное элде элчи-ферма мюлк къурайды. Талай къумалы (къызыл-къыр) тууар мал алып, аланы жайыу бла кюрешип тебирейди.

- Ийнеклени бу тюрлюсю сютлюдю, республиканы ёзен районларына тап келишеди, - дейди Тахир. – Уллу, гитче мюлкледе да ала иги кечинедиле, кеслери да жууашдыла. Энчи къарау излемейдиле, иммунитетлери кючлюдю, башха жерни хауасына да терк юйренедиле. Быллай ийнекле эмда бугъала иссиликге иги чыдайдыла. Алай болгъанлыкъгъа, биринчилерини сютлери чыртда азаймайды.

Мюлкню къурагъанындан сора Осман улу республиканы Эл мюлк министерствосуну юйюр малчылыкъ фермалагъа субсидияла бериу жаны бла программасына къатышады. Анда сютлю малчылыкъ бла байламлы инвестициялы проектин жетишимли къоруулап, конкурс айырыуладан ётеди, ахча къоллу болуп ишин бютюнда тири бардырып тебирейди.

Бюгюнлюкде жашны фермасында жыйырма ийнек барды. Алагъа юч малчы къарайдыла. Мюлкде сют саугъан оборудование болмагъаны ючюн бу жумушну къоншуда фермада тындырыргъа тюшеди. Узакъгъа созмай, жаш аны сатып алыргъа неда кесинде аллай мадар этерге таукелди.

Эл мюлк, бегирекда малчылыкъ, къыйын бёлюмге саналады, бютюнда энди ишлеп башлагъанлагъа. Мында тийишли билим изленеди. Этилген къоранчла да терк къайтарылмайдыла. Тахир да аллай бир жылны ичинде ишни   энчиликлерине тюшюннгенди, бек сюйюп кюрешеди. «Тюзюн айтханда, кёп къыйын, кёп заман кетеди. Хайырын а къачан кёрюп башларыгъынг белгисизди. Алай кёлсюзлюк этерге заман жокъду. Не десем да бу иш манга сейирди, мен аны андан ары бардырыргъа таукелме», - деп белгилегенди Осман улу.

Юйюрюнде да билеклик этедиле жашха. Быйыл ол малланы санын жюзге жетдирир  умутлуду. Ызы бла бишлакъ, хумжу, сют баш хазырларча  цех да  орнатыргъа сюеди. Харкюнлюк баш ауруу а – мал ашды. Энди айнып башлагъан мюлкге  ол не заманда да жетишмейди. Бир  кесегин ол кеси ёсдюреди, къалгъанын а сатып алыргъа тюшеди.

Кесине, республикагъа да  онгу болгъанына Тахир иги да ыразыды. Хау, ол кёп заманны алады, бирде олтуруп солур амалы  да болмаучуду. Алай дагъыда тамблагъы кюннге  таукел къарай жашайды.

Улбашланы Мурат.
Поделиться: