Бийик билим алып чыгъар онглары барды

          Тюзетиучю учреждениялада тургъан тутмакъланы да энди  бийик билим алыр онглары барды. Москвада  "Синергия" финанс-промышленный университетни  регион келечиси  Владимир Кулагин  бу кюнледе  КъМР-де УФСИН-ни  колонияларында болгъанды эмда  анда тургъанланы вузну   факультетлери, билим бериу программалары бла да шагъырей этгенди, окъутуу  къалай къуралгъанындан  да   хапар айтханды.
      Тюбешиуге къатышханла уа  къонакъгъа  соруула берирге  онг тапхандыла. Алай бла  25 адам бийик билим алыргъа сюйгенлерин билдиргендиле. Аланы барысына да  керекли шартла бла буклетле юлешиннгендиле.
     Тутулгъанла бла юйретиу эмда социал иш бардыргъан къауумну инспектору   Залина Куважукова айтханнга кёре,  бийик билим алыу колониячыланы  тюзетиуге себеплик этген къыйматлы амалладан бириди. Андан сора да, окъуулу болуу аланы   андан ары жашауларын къураргъа болушуругъуна сёз да жокъду, деп билдиргендиле бизге КъМР-де УФСИН-ни пресс-службасындан.

Люба Адилова.
Поделиться: