Турбизнесни жетишимли бардырыуну жашырынлыкъларын ачыкълау

Кёп болмай Къабарты-Малкъар къырал университетде  «Leisurebusinesstravel» тюрк компанияны   таматасы Илимдар Риза  студентле бла тюбешгенди эмда туризм жаны бла бизнесни къурауну, ол жетишимли ишлерча не этерге керек болгъаныны юсюнден ушакъ бардыргъанды.

 Илимдар дипломатха окъугъанлыкъгъа, ол усталыкъ бла бир кюн да  ишлемегенди. Алай алгъан билими  тур бизнесде иги жарагъанды. Ол урунуу жолун  «Альтаир», «Радуга Травел» эмда башха белгили туризм компаниялада башлагъанды. Бусагъатда аны  фирмасы адамланы  Тюркге, Азербайджаннга, Гюржюге, Кипрге эмда башха къыраллагъа солургъа жибереди, санаторийледе саулукъларын игилендирирча онгла да тапдырады.

-  Бюгюнлюкде турист кёпню биледи, башха къыралгъа алгъадан хазырланып, иги солур ючюн барады. Къонакъ заманын керексизге ётдюрмез ючюн бай программасы болгъан   тур  къураргъа тийишлиди. Ол себепден бу бёлюмде къармашхан адам къуру билимин ёсдюргенлей, жангы мадарла излегенлей турургъа керекди.

Къонакъ маданият туризмни юсюнден да айтханды.   Сёз ючюн,  кёпле бусагъатда   «Великолепный век», «Чёрная любовь» эмда башха  белгили  сериалла тюшюрюлген жерледе болургъа излегенлерин да   билдиргенди.

Ызы бла ол студентлени  Къабарты-Малкъарда   эм иги турист маршрутну къурау жаны бла конкурсха къатышыргъа  чакъыргъанды. «Хорлагъанланы сейир саугъала сакълайдыла: унутулмазлыкъ солуу эм туризм жаны бла практикаларын ёсдюрюу», - дегенди Илимдар Риза.