«Туугъан жериме къайтырыма ишеклигим жокъду»

Алгъаракълада Болгарияны Благоевград шахарында армрестлингден дунияны биринчилиги болгъанды. Анда бизни жерлешибиз Отарланы Надира алтын майдалны алгъанды. Жыйырмажыллыкъ спортчу онг, сол къоллары бла аны бла эришгенлени барысын да хорлагъанды. Ары дери ол Европа даражада да алчы болгъан эди. Бюгюн а Надира бизни ушакъ нёгерибизди.

- Надира, бек алгъа, газет окъуучуларыбызгъа къайдан болгъанынгы, спорт бла къалай кюрешип башлагъанынгы билдирсенг эди.

- Мен Кёнделен элденме, анда ючюнчю номерли школну тауусханма. Школдан сора Волгоградны архитектура-къурулуш къырал университетине киргенме, бусагъатда Москваны архитектура институтуну тёртюнчю курсуну студентиме. Жарау этип эки жыл мындан алгъа Волгоградда окъугъанымда башлагъанма. Алай ёмюрде да армрестлинг бла кюреширикме деп умут этмегенме, ары кесим да билмей тургъанлай тюшгенме. Биринчи курсда болгъаныбызда бизни тюрлю-тюрлю спорт секциялагъа айыргъандыла. Къолланы кючлерин силометр бла ёнчелегенлеринде, мени эсебим 78 килограмм болгъанды. Андан сора жараулагъа жюрюп тебирегенме эм ол жылда окъуна областьда эришиуледе кюмюш майдалны алгъан эдим.

- Школда окъугъанынгда уа спортха сейиринг бармы эди? Баям, физкультураны башха дерследен айырып сюйгенсе?

- Угъай, школ заманымда окъуудан сора бир башха затха сейирим болмагъанды. Битеу эсими анга бергенме.

- Архитектура бек сейир, аны бла бирге уа къыйын да усталыкъды.

- Хау. Школда суратланы ариу ишлегенме, математиканы да айырып сюйгенме. Атам Отарланы Расул кеси да къурулушчуду, Кърымда «ССК»Газрегионда» механизированный колоннаны башчысыды. Ол мени да бу сферада ишлеригими сюйгенди. Анам а Атмырзаланы Аминни къызы Людмила. Сабий музыка школну элде филиалыны заведующийиди, фортепианода согъуудан устазды. Ол да аны жолу бла барырымы излегенди. Мен а къурулушха, искусствогъа да жууукъ специальностьну сайлагъанма – «Архитектурада реконструкцияла эм реставрация». Нек дегенде, архитектура – ол къурулушда искусстводу.

- Надира, окъуу бла жарауну бирге бардыгъан тынч болмаз?

- Бек къыйынды, алай болгъанлыкъгъа, онг табылады. Бир жарау 2,5 – 3 сагъатха дери созулады, залгъа тёрт кюнню жюрюйме. Эришиулени аллында уа ыйыкъда алты кюнню жарау этебиз.

- Тренеринг а кимди?

- Мени Артур Агаджанян юйретеди, ЦСКА-гъа жюрюйме. Ары дери уа Виктор Савич бла Запир Султанбегов юйретгендиле.

- Дунияны чемпионатына биринчи кере къатышып «алтынны» алыу, айхай да, уллу жетишимди. Аны болдурур ючюн, кёп кюреширге керекди. Бу чемпионат санга къалай ётгенди, мындан арысында къаллай муратларын бардыла?

- Бу эришиуге барырдан алгъа Бухарестде Европаны биринчилигинде къытханма, ол дуния даражалы турнирге къатышыргъа онг бергенди. Анга 52 къыралдан 1500-ден аслам спортчу сынашхандыла. Мен битеу да тёрт тюбешиу бардыргъанма эм аланы барысында да къытханма. Быллай даражалы эришиуледе биринчи кере болгъанма, аны ючюн бир кесек жарсый эдим. Мени бла сынашхан къызланы кёбюсюн ары дери кёрмегенме, аны ючюн хорлагъаныма бек къууаннганма. Жарауларым, кюрешгеним мени муратыма жетдиргендиле. Энди уа биягъы окъуугъа берилирге деп турама, алай жарауну да къоярыкъ тюйюлме.

- Надира, башха шахарлада жашагъан спортчуларыбыз эришиулеге эки жерни атындан къатышыучудала, сен а?

- Алгъа Волгоград ючюн эришгенме, шёндю – Москва ючюн. Бусагъатда Къабарты-Малкъарны бла Москваны атындан бирге эриширча соруугъа къарала турады.

- Къарындашларынг, эгечлеринг бармыдыла, ала уа спорт бла кюрешемидиле?

- Эки гитче къарындашым бардыла, Керим бла Бияслан. Керим атам бла Кърымда ишлейди, Бияслан а спорт школгъа боксха жюрюйдю. Ол Тырныауузда бла Пятигорскда эришиулеге къатышханды, алада алчы жерлеге да чыкъгъанды.

- Москвагъа баргъанла артха къайтыргъа сюймеучюдюле. Сени уа умутунг къалайды?   

- Артха къайтырыма ишеклигим жокъду. Алгъа кезиуледе жангы шахаргъа юйренирме, юйге алай бек тансыкъ болмазма, деп ышана эдим. Алай а ахырысы бла да башха тюрлю болду. Жериме тартылмай, тансыкъламай бир кюн да ётмейди. Ма бюгюн да мында энтта бир кюнню турурча, билетими, кюрешип, тамблагъа алдыргъанма. 

Ушакъны Кульчаланы Зульфия бардыргъанды.
Поделиться: