Сууну тергеген счётчикге пломба къалай салынады?

Таза сууну тергеген приборгъа пломба салыр ючюн не этерге кереклисин КъМР-ни Тарифле эмда жашау журтлагъа надзор этиу жаны бла къырал комитетинде ангылатхандыла.

Алай бла биринчиден Водоканалгъа неда кёп фатарлы юйню жумушларына къарагъан компаниягъа барып заявление берирге керекди. Дагъыда аладан специалист келлик кюню эмда заманы бла келиширге. Ол счётчик къалай орнатылгъанына эмда документлеге къарап, терс этилген зат кёрмесе - пломба салады эмда тийишли акт береди. Анга эки жаны да къол салыргъа керекдиле. Алай бла приборну ишлеген заманы актда кёргюзтюлген кюнден тергелип башланады.

Быллай счётчикле тап ишлегенлерин билир ючюн аланы кезиу-кезиу тинтип турургъа керекди. Аны болжалы ол актда жазылады. Заманы жетип, алай иши этилмесе - прибор тапсыз ишлегеннге саналады. Тинтиу бла къайсы организация кюрешгенин Водоканалгъа сёлешип билирге боллукъду. Шёндюледе СМИ-де законлагъа ол ишни хакъсыз этиу бла байламлы тюрлениуле кийириллигини юсюнден айтыла туруучуду. Алай къабыл этилген норматив акт а энтта да жокъду.

Эсеплеучю приборну заманы жетсе, аны тинтип айланмай жангы счётчикге алышындырыргъа да болады. Алай хайырланыучула бу ишни  кеслери этерге эркин тюйюлдюле. Аны тамамлар ючюн водоканалгъа барып заявление берирге керекди.

Шёндюледе пандемия бла байламлы чеклениулени хатасындан счётчикни тинтген къыйыныракъ боллукъду. Аны себепли РФ-ни Правительствосу быйыл 2-чи апрельде 424 номерли бегими бла келир жылны биринчи январына дери ол излемни кючюн тыйгъанды. Алай бла юсюнде пломбасы бузулмагъан эсе, аны кёргюзтюулери ары дери да тюзге саналгъанлай  турлукъдула.