Биринчи мотоцикл агъачдан къуралгъанды

1885 жылда 10 ноябрьде  Германияда Бад-КаннштатданУнтертюркхайм шахар таба  ол кезиуледе болмагъанча алай терк баргъан бир сагъатха 12 километр къызыулукъ бла – биринчи мотоцикл къызынып тебирейди. Мотоцикл деп да анга къалай айтхын…Мотору болгъан велосипед десе тюзюрек болур, рамасы, чархлары да агъачдан ишленнген. Чархлары уа, велосипеддеча, эки угъай, тёрт окъуна эдиле, кеслери да къанжал бла тышланнганла.Аланы тёрт болгъаныны сылтауу конструктор велосипедде окъуна жюрюй  билмегенинде эди.

Ол себепден биринчи мотоциклге да, ол ары-бери аумай барырча, эки жанындан энтта да биришер чарх къошаргъа тюшгенди.

Шинтикни тюбюнде орналгъан моторну кючю  атныкъындан  жарымына  жетгенди. Отлукъну орунуна уа не бензин неда чыракъ суу хайырланылгъанды. Аны  къабындырыр ючюн  багъыр таякъчыкъны от бла къыздырыргъа керек болгъанды. Ол а, ызы бла, отлукъну къабындырып тургъанды. Бир тюрлю тыйгъыч болмаса, мотоциклни ишлетип башларгъа бир минут къоратылгъанды.

Мотоциклле, теренирек тинтгенде уа, машиналадан эсе аз-маз алгъаракъ окъуна къуралгъандыла дерге боллукъду. Аланы асламысында автомобильле къурашдырыргъа сюйгенле этип болгъандыла, техникада къарыуларын сынар умутда.

Бу мотоциклни уа Адольфом Даймлер жыйгъанды. Аны атасы –Готлиб Даймлер,Карл Бенц бла бирге шёндю сау дуниягъа аты айтылгъан  автомобильлени чыгъарыучу предприятияны ачхан эди.

Алай бла,  биринчи мотоцикл хазна абериге жарамазлыкъ болгъан эсе да, быллай техниканы къурауну мурдорун а ол салгъанды. Конструкторну атасы анга патент алгъанлыкъгъа, бу затха сурам боллукъ тюйюлдю деп, аны заводда чыгъарып башларгъа артыкъ ашыкъмагъанды. Жашы уа, агъачдан  бла темирден ишленнген, аны себепли жумушакълыкъ деген къаты бла да озмагъан мотоциклде бир кере учуп кёргенинден сора быллай «сюек ууатыучугъа» мындан арысында арталлыда олтурлукъ тюйюлме, деп къойгъанды.

Улбашланы Мурат хазырлагъанды
Поделиться: