Медицина къапла бла жалчытылыныуну халы

Къабарты-Малкъарда коронавирус жайылгъан болумлада женгил промышленность бёлюмде къармашхан  предприятияланы  бир къаууму   медицина къапла эмда энчи кийимле тигип   башлагъандыла, деп билдириледи КъМР-ни Промышленность, энергетика эм сатыу-алыу  министерствону пресс-службасында.

Жыйырмагъа жууукъ кийим тикген предприятие мартны ахырындан тебиреп эки, юч кюнню ичинде медицина къапланы производствосун  башлагъандыла.   Алай бла бюгюнлюкде  суткагъа ала   22-25 минг  къап хазырлайдыла. Ол кёрюмдю  апрельден эсе  он кереге асламды.  Саулай  да айтылгъан заманнга аланы 500 минг чакълысы  этилгенди.  Хазыр продукция «Магнит», «Ласточкино Гнездо», «Вестер Гипер», «Горный»,  «Оазис», «Кенгуру», «Пятёрочка» эм башха сатыу-алыу  тюкенледе да барды. 

 Пандемияны кезиуюнде Къабарты-Малкъарны  Башчысы хар адам медицина къапла киерча буйрукъ чыгъаргъанды.  Анга кёре бу жаны бла  жамауат  жунчумазча да мадар излерге  тюшгенди.  Чекле салыннгандан  сора биринчи кюнледе медицина къапланы жаланда сегиз предприятие тигип башлагъанды. Бюгюнлюкде уа аланы саны жыйырмагъа жетеди. Хазыр продукцияны  предприятияла, организацияла эм тюкенле да  аладыла.

Бусагъатда республикада  «ВоенТекстильПром»  медицина къапла тигерге сертификаты болгъан биригиудю.  Андан сора да, эки предприятие, тийишли документлени хазырлап,  эркинлик алырча   Росздравнадзоргъа жибергендиле.   Къабарты-Малкъарны Промышленность, энергетика эм сатыу-алыу министерствосу медицина маскала чыгъаргъан  организацияла бла   предприятияланы кюн сайын  ишлерине  мониторинг этеди. 

Бюгюнлюкде «Авангард», «Текстиль Имидж»,  «Ева» эм «Промлайтплюс» биригиуле да медицина къапла бла вирусдан сакълагъан  энчи кийимлени суткагъа  500-ден  башлап 3 мингнге дери чыгъарадыла. Аланы иги кесеги республиканы медицина учрежденияларына ашырылады. 

Эсге сала айтсакъ, пандемия кючленнген кезиуде     «Промлайтплюс», «Текстиль Имидж», «Ева», «Воентекстильпром», «Текстиль»  эм «Югтекстильторг» Нальчикни, Майскийни эм Прохладныйни ара стационарларын хакъсыз  медицина къапла эм  энчи костюмла бла жалчытып тургъандыла.  

Стационарлада уа медицина ишчилени саулукъларына заран жетмезча бар амалла этилгендиле. Ол санда коронавирус бла жатхан саусузлагъа бакъгъан больницала  эм терк болушлукъ берген служба керекле бла къошакъ халда да  жалчытылынадыла.

Курданланы Сулейман.
Поделиться: