Грантны чеклеринде ишле тап бардырыладыла

Кёп болмай КъМР-ни къурулуш эм жашау журт-коммунал мюлк жаны бла министрини орунбасары, республиканы баш архитектору Астемир Унажоков, Прохладный шахар  округну администрациясыны башчысы Игорь Тараев эм  Чегем муниципал районну администрациясыны башчысы Юра Борсов   Бахсанда болгъандыла. Ала шахарны  «Мамырлыкъ, маданият эм солуу» деген ара паркында  ишле къалай баргъаны  бла шагъырейленнгендиле, деп билдиредиле муниципалитетни пресс-службасындан.  

Бахсан шахар округну администрациясыны башчысы Хачим Мамхегов къонакъла  бла журналистлеге объектде къаллай ишле тамамланнганларын эмда жууукъ заманда не этиллигин  билдиргенди.  Ол аттракционла, амфитеатр, ашаучу жерле, спорт майданла, саулай айтханда, тынгылы солурча онгла къураллыкъларын айтханды. Ишле саулай  быйылны ахырына бошаллыкъларын да чертгенди. 

Бахсан шахар округну проекти   гитче эм орта шахарланы арасында бардырылгъан битеуроссей конкурсда хорлап, грантха тийишли  болгъанды. Прохладна бла Чегем районла да   бара тургъан жылда  анга къатышыр ючюн  къыстау кюрешедиле.  Ол себепден  къоншу шахарны жетишимлери бу жаны бла сынамны байыкъландырыуда ахшы  себеплик этерикдиле.  

Магометланы Сулейман.
Поделиться: