Уллу илмугъа гитче атламла

 Кёп болмай Къабарты-Малкъар къырал университетде дисциплинала аралы проектлени конкурсу ётгенди. Анга Бабугентде кадет школ-интернатны, Нальчикни 20-чы, Бахсанны 6-чы эм Хасанияны 16-чы номерли  орта школларыны келечилери къатышхандыла.

Бахсанчыла онбир проект кёргюзтгендиле. Сёз ючюн, Бэлла Тхамадокова каникулла, окъуу, дневник,  тюрлениуле дегенча сёзлени магъаналарыны юсюнден айтханды. Бешинчи классда окъугъан Алан Нагоев а, Лев Толстойну «Кавказский пленник» хапарына терен анализ этип, кавказчыланы жашауларыны юсюнден сейир шартла келтиргенди. Башхаланы да ишлери орус тил бла байламлы эдиле: орфоэпия, лексиканы бла афоризмлени байлыгъы, жаш тёлю сленг дегенча къыйын темалагъа жораланнгандыла.

Жюрини санында КъМКъУ-ну гитче школ академиясыны таматасы Жабаги Насипов, «Тохтаусуз айнытыу араны» таматасы Азамат Люев,  вузгъа хазырлау эм усталыкъ сайларгъа себеплик этиу управленияны таматасы Аксана Карашева, Бабугентде кадет школ-интернатны таматасы Эристауланы Абдурахман эм Нальчикни 20-чы номерли орта школуну таматасы Мая Асланова болгъандыла. Ала  окъуучула аламат проектле хазырлагъанларын эмда бир-бир проблемалагъа жангы кёзден къаратханларын белгилегендиле. Конкурсну ахырында «Очень замечательное имя прилагательное» деген иши ючюн эм кёп балл  бешинчи классда окъугъан Диана Ордоковагъа берилгенди.

Магометланы Сулейман.
Поделиться: