Бек тирилеге бла хунерлилеге – сый-махтау

      Кёп болмай  Къабарты-Малкъар къырал университетни волонтёрларыны жыйылыуу болгъанды.  Анда алагъа аталгъан жылда къаллай ишле тамамланнганларыны юсюнден  айтхандыла.

Бюгюнлюкде университетде бу жаны бла алты профиль бёлюм ишлейди. Озгъан жылда саулай къыралда кёп тюрлю акцияла, митингле, фестивальла, конкурсла, билим бириу форумла да бардырылгъандыла. Алагъа    бизни жерлешлерибиз да  тири къатышхандыла.
КъМКъУ-ну жаш тёлю политика эм юйретиу жаны бла управлениясыны таматасы  Астемир Кясов, волонтёрлагъа аталгъан жыл бошалсада,  аланы ишлери  тохтамагъанын эсге сала, мындан арысында да къыралгъа,  жамауатха  да хайыр келтирир ючюн,  кючлерин аямай, тири къармашыргъа чакъыргъанды.  
   Ызы бла эм игилени саугъалагъандыла. Анда  волонтёр къымылдауну айнытыугъа уллу къыйын салгъан эмда бар ишлеге  тири къатышхан  эки жюзге жууукъ адамгъа грамотала  берилгендиле. Ахырында  «Жылны волонтёру» деген республикалы конкурсда хорлагъанла да  белгили болгъандыла.  Алай бла, чыгъарылгъан эсеплеге кёре, информатика, электроника эм робототехника институтну  окъуучусу  Диана Шогенова биринчи жерни алгъанды.   Право, экономика эм финансла институтну студенти  Созайланы Жамбулат а жюрини саугъасына тийишли болгъанды.
   Ол кюн жаш адамла, жырла айтып, тепсеп, КВН-де ойнап, чыгъармачылыкъ жаны бла хунерлерин кёргюзтгендиле.  Жыйылыу  бирге КъМКъУ-ну волонтёрларыны гимнин айтыу бла бошалгъанды.