Урлукъну игилендириу эмда чыгъарыу жаны бла ара

Кёп болмай Къабарты-Малкъар Республиканы экономиканы айнытыу министри Рахайланы Борис, «КъМР-ни айнытыу корпорация» акционер обществону башчысыны къуллугъун толтургъан Чочайланы Ахмат  бла  Прохладна районда  «Отбор»  агрофирмада  болгъандыла. Ала  «СКФО-ну 2025 жылгъа дери айнытыу» къырал  программаны  чеклеринде бардырылгъан   урлукъну игилендириу   араны  иши бла    шагъырейленнгендиле.

Предприятие сабанлыкъланы жалчытырча   нартюхню   урлугъуну производствосу бла кюреширикди. Проектни багъасы   569,58 миллион сомгъа жетеди. Андан фирма кесинден  449,7 миллион сом къоратханды, къаралдан да  119,9 миллон сом чакълы  болушлукъ этилгенди.  Арада   73 адамгъа   ишчи жер барды.  Жылгъа мында беш тонна хазыр продукция чагъарыллыкъды.   Ол толу кючю бла ишлеп башласа, жыл сайын  республиканы бюджетине    26,8 миллион сом налог ётдюрюллюкдю.

Келир заманда  «Отбор» биригиу нартюхню, къудоруну эм мирзеуню урлугъу бла Къабарты-Малкъарны эм Шимал Кавказ федерал округну,  ара регионланы эм тыш къыралланы  жалчытыр муратлыды. 

Былтыр  сентябрь айда окъуна  объектге керек     инженер сетьле тартылгъандыла,    транспорт  инфраструктура жарашдырылгъанды,  жангы оборудование эм техника да  барды.  Проектни хайыры бла республиканы экспортун айнытыргъа, ол санда «Халкъла аралы кооперация эм экспорт» миллет проектни жетишимли  бардырыргъа да онг табыллыкъды.  

Эсге сала айтсакъ, Къабарты-Малкъарда «Халкъла аралы кооперация эм экспорт» миллет эм «Агропромышленный комплексни продукциясын экспорт этиу» федерал  проектлени бардырыу бла байламлы РФ-ни Эл мюлк министерствосу бла КъМР-ни Правительствосу келишим  болдургъандыла. Анга кёре, буруннгу жыл бла тенглешдиргенде 2024 жылгъа регионну  АПК-сыны экспорту 2,2 кереге ёсерге керекди. 

 

Магометланы Сулейман.
Поделиться: