Алтын неда кюмюш ахчаладан иги саугъа болмаз

Россельхозбанкны Къабарты-Малкъарда бёлюмюнде хайырланыучулагъа деп багъалы темирледен жарашдырылгъан ахчала сатыучудула. Анда айтханларына кёре, ала алтындан, кюмюшден, платинадан неда палладийден боладыла. Кеслери да тюрлю-тюрлю темалагъа, байрамлагъа, кюнлеге неда белгили адамлагъа жораланадыла. Сёз ючюн шёндюледе келир 8-чи мартха тиширыуланы халкъла аралы кюнюне аталып «Ананы сюёмеклиги» деген серия жарашдырылгъанды.

Дагъыда «Европаны живописьни ёхтемлиги», «Зодиакны белгилери», «Георгий Победоносец» дегенле да бардыла. Ала бары да proof деген качество бла этилгендиле, хар бири энчи орунчукъда турадыла. Юслериндеги суратлары  лазер гравировка бла ишленипдиле. Быллай ахчаланы хар бирини да сертификаты болуучуду.

Банкны бёлюмюню финанс рыноклада жумушла тамамлау службасыны башчысы Сарбашланы Бэлла айтханнга кёре, быллай ахчаланы багъасы ала къайсы темирден этилгенлерине кёре тергеледи. Аланы хар бирини юсюнде энчи номери барды. Банк аны бла бирге ол адамны къолуна къайдан тюшгенине шагъатлыкъ этген документле эм ауурлугъун кёргюзтген сертификат да береди.

Багъалы темирле  ахчаны сакъларгъа, инвестицияла этерге онг берген амалгъа саналадыла. Алагъа сейирлери болгъанла 40-34-29 номер бла сёлешсинле неда банкны кесине барсынла. Аны адреси: Нальчик, Къулий улу атлы проспект, 10а. Бу иш бла байламлы толу информацияны www.rshb.ru интернет-сайтда табарыкъсыз.

Улбашланы Мурат.
Поделиться: