Кеф водитель жолда жюрюуге къатышханлагъа бек уллу къоркъууладан бириди. Эсиргенлени хаталарындан адамла жоюлгъанлары, быллай бузукълукъ ючюн уголовный жууапха тартылыннганы, уллу тазирле да бирлени бу «жигитликден» тыймайдыла.
Законлагъа тийишлиликде, кеф водительни транспортну жюрютюрге эркинлиги сыйырылады эмда анга тазир салынады. Сёз ючюн, бузукълукъну къайтарып этген адам 300 минг сом тёлерге борчлуду.
Ахыр жыллада къыралда жолда жюрюуню жорукъларын сакъламагъанланы жууапха тартыу къатыланады. Ол а хайыр келтирмей къоймагъанды. Бирле уа кеф водительле салгъан хатаны ангылап, бу аман къылыкъны къойгъандыла, насыпха. Алай кеслерине базыннганла алыкъа бардыла.
КъМР-де УГИБДД-дан бизге билдиргенлерича, былтыр кеф водительлени хатасындан болгъан авариялада 58 адам ачыгъанды. Жылны аллында бардырылгъан рейдлени кезиуюнде уа къысха заманны ичинде автоинспекторла 70 кеф водительни ачыкълагъан эдиле. Жарсыугъа, быллай къамамагъанланы асламы 20-40-жыллыкъладыла. Ала кеслерини жашаулары, тёгерекдегилени саулукълары ючюн жууапсызлыкъны кёргюзтедиле.
Сёз ючюн, республиканы 27-жыллыкъ инсаны кеф болуп 5 кере тутулгъанды. Ол медицина тинтиуледен ётерге унамай тохтагъанды. Жаш адамгъа эки кере тазир салыннганды – 30-шар минг сом. Алай машинаны жюрютюрге эркинлиги сыйырылгъанына да къарамай, ол быйыл 9 январьда биягъы эсирип, праволары да болмай тутулгъанды. Энди жаш уголовный жууапха тартыллыкъды, аны эркинлиги 2 жылгъа дери сыйырылыргъа боллукъду.
Полициячыла, республиканы жолларында тинтиуле бардырып, эсирген водительлени, бузукъчуланы ачыкълау ишни андан да бек тирилтирикдиле. Право низамны сакълаучула жолда жюрюуге къатышханланы барысын да жорукъланы сакъларгъа, жолда сакъ болургъа, бир бирге хурмет этерге чакъырадыла.
Былайда законланы эсгерсек тюз боллукъду, баям. Алай бла РФ-ни Административ бузукълукъланы кодексини 12.8-чи, 12.26-чы статьяларына тийишлиликде, машинаны кеф болуп жюрютген, медицина тинтиуледен ётерге унамагъан водительге 30 минг сом тазир салынады эмда транспортну жюрютюрге эркинлиги 2 жылгъа сыйырылады. Эсирип тутулгъан водитель бу бузукълукъну къайтарып этсе уа, ол уголовный жууапха тартылады.
