Жолланы жюз километрден асламысына ремонт этилликди

Быйыл Къабарты-Малкъарда «Къоркъуусуз эм качестволу автомобиль жолла» деген миллет проектни чеклеринде  республикалы магъаналы  жолланы  101 километр чакълы бирине ремонт этилликди.   Ол  былтыр бла тенглешдиргенде, 32 процентге кёпдю, деп билдириледи КъМР-ни Жол мюлк управлениясындан.

Ведомствону таматасы  Рафаэль Акопян айтханнга кёре, жолланы жангыртыу  хар районда да  бардырыллыкъды. Аны чеклеринде жангыдан  асфальт жайылыкъды, белгиле орнатыллыкъдыла эм ызла тартыллыкъдыла. Былтыр  проектни чеклеринде жолланы  2940 километринден  76,4 километр чакълы бирине къаралгъанды. Ол санда кече жарыкъ болурча да мадар  этиледи. Быйыл да чыпынлары бла  чыракъланы 35 километр чакълы бирде саллыкъдыла.  Ол да былтырдан 40 процентге асламды.    

Эсге сала айтсакъ,  «Къоркъуусуз эм качестволу автомобиль жолла» деген проект къыралны 83 субъектинде, ол санда  104 шахарында  бардырылады. Аны хайыры бла 2024 жылгъа регионлада  магъаналы жолланы 50,9 процентин тийишли мардалагъа келиширча, аварияла эки кереге азайтылырча, жолланы узунлугъуна   эки кереге къошулурча эм къырал трассалада транспортну 10 процентге селейтирча этерге онг  боллукъду. 

Магометланы Сулейман.
Поделиться: