Хорлагъанла Москвагъа атланырыкъдыла

    Школчуланы  битеуроссей олимпиадасыны Къабарты-Малкъарда кесеги  быйыл 11 январьда башланнганды эмда  25 февралгъа дери бардырыллыкъды. Анга республиканы районларындан, шахарларындан, эллеринден  да  9-11-чи классладан  мингден артыкъ окъуучу  къатышыргъа ыразылыкъларын билдиргендиле. Ала бары да эришиулени муниципал кесегинде айырмалы болгъанладыла. Регион кесеги уа жыйырма бир предметден  бардырыллыкъды. Анда хорлагъанла, республиканы атындан  быйыл жаз башында Москвагъа барып, олимпиаданы ахыр кесегинде билимлерин кёргюзтюрюкдюле.
 Тюнене уа ала Нальчикде  Сабий чыгъармачылыкъны «Кюн шахар» академиясында   химиядан  сынауладан ётгендиле.
  -Бусагъатда мында  республикалы олимпиаданы экинчи кесеги бардырылады. Анга  онбир жаш бла къыз сайланнгандыла. Берилген заданияла бек къыйындыла. Аланы толтургъандан сора, окъуучула практика ишге кириширикдиле. Аны ючюн деп битеу керекле хазырдыла. Жаш адамла химия препаратла бла  кеслерин ачытмазча мадарла да этилгендиле.  
 Столлада химия керекледен сора да,  окъуучуланы  жууапларыны тюз болгъанларын бла къалгъанларын кёргюзтген индикаторла  бардыла,-дегенди билим бериуню сыйлы ишчиси, экология-биология араны устазы, олимпиадада химия предмет ючюн жууаплы Татьяна  Карпенко бизни бла ушагъында.
   Биз конкурсантла бла да сёлешгенбиз.  Кантемир Тажев   Терек шахардан келгенди, 11 «А» классны окъуучусуду. Олимпиаданы ахыр кесегине тюшерге бек сюйгенин айтханды. «Химияны бек жаратама, энчи курслагъа да жюрюгенме. Бюгюн а билимим бла юч бек кючлюню санына тюшерме деп турама, аны ючюн къолумдан келгенни  аярыкъ тюйюлме», -дегенди жаш.